- Det kryr av lopper!

Søfteland Turn- og Idrettslag har samla lopper sidan april. - Vi har så mykje at vi ikkje har sjanse til å stilla ut alt i ein runde, seier Myrna Hatleli.

Kjetil Vasby Bruarøyonsdag 02. sep. 2009 07:37

STIL arrangerer loppemarknad for første gong, og dugnadsviljuge medlemmar, rundt 50 av dei, har vore i sving for å samla inn lopper i Os og i Fana.

- Det har vore ein kjekk prosess. Vi i laget har blitt betre kjent, og responsen har vore fantastisk, seier Hatleli.

Sjølv om Søfteland skule stiller både gymsal og andre lokaler til disposisjon, blir det ikkje plass til å stilla ut alle loppene på ein gong.

Frå nytt til antikk
Loppemarknaden opnar klokka 11 både laurdag og sundag. I utvalet er det alt frå kjøkkenutstyr, klede og møblar til leikar, bøker, blad og hobbyutstyr.

- Vi har fått inn antikk og vi har fått ting som enno ikkje er pakka ut av emballasjen. Og kurositetar som ein antikk salong spesialbygd for eit hus på Kalfaret og destilleringsapparat. Akvarium, takboks, TV og sportsvogn.

- Og for å vera ærleg, vi har fått ein del ting vi rett og slett ikkje veit kva er, seier Myrna.