Dobbelt trippelsiger

I helga gjekk finalen i Golf Tour Hordaland (Hordatouren) på Herdla golfbane. Før runden leia Sverre Marcelius, Bjørnefjorden Golfklubb samanlagt, men i finalen fekk han tøff konkurranse av ungguten Anders Engelsen, også han frå Bjørnefjorden.

- Anders takla dei vanskelege tilhøva laurdag best av oss og spelte ei utruleg bra runde på 63 slag, fortel Marcelius som sjølv brukte 70 slag i vinden.

Mellom dei to plasserte Bengt Tore Olsen seg med 66 slag på par 62-banen.

Sundagen sikra dei tre trippelsiger etter runder på 66 (Anders og Sverre) og 68 (Bengt Tore) slag.

Trippel også totalt

Hordatouren har gått føre seg i heile sommar sidan den starta på Sotra i månadsskiftet april/mail.

- Det er ikkje alle som har prioritert touren, noko eg tykkjer er litt rart sidan det er dei beste i fylket som møtast til dyst, seier Marcelius.

Sjølv er han blant dei som har prioritert den, og sundag fekk han betalt for strevet då han mottok gavesjekken på golfutstyr til 4000 kroner for første plassen.

Med det gode spelet på Herdla sikra Anders Engelsen seg andre plassen framfor Bengt Tore Olsen og trippel siger til Bjørnefjorden Golfklubb.

Turneringa har vore spelt på dei sju banane på Sotra, Bjørnefjorden, Meland, Fana, Bergen, Voss og Herdla.

Fantastisk miljø

I NM for halvanna veke sidan blei Solveig Helgesen noregsmeister. Tidlegare Bjørnefjorden-spelar Øystein Engevik freister lykka som profesjonell og speler med dei beste. Herrelaget har dei siste åra spelt i elitedivisjonen og damene rykka opp igjen etter årets lag-NM.

- Kva er det som gjer at Bjørnefjorden leverar så mange gode golfspelarar?

- Vi har eit fantastisk miljø, sjølv om satsinga no er mindre enn tidlegare grunna dei økonomiske tilhøva, forklarar Marcelius som òg er PRO (trenar) på Bjørnefjorden.

- Eg trur vi ser resultata av eit langsiktig arbeid, kor vi blant anna har reist på treningsleir med dei beste juniorane kvar vår.

- Skal vi klare å halde fram med den utveklinga treng vi å få inn sponsorar som kan hjelpe oss med å gje eit betre tilbud til enda fleire. Det er berre å ta kontakt om det er nokon som sit på litt pengar til overs, avsluttar PROen med eit smil.