Dobla besøk

- Vi har ikkje eksakt opptelling klar, men viss eg seier at vi hadde 650 inne fredag og 580 laurdag så trur eg det stemmer ganske bra, seier Andreas Lindborg.

Brørne Andreas (21) og William (23) starta med 200 i foreldra sin hage og tredobla til 600 på garden til Olav Valle i fjor. På den same garden var det i år meir enn dobbelt så mange dei to festivaldagane.

SJÅ 20 BILDE FRÅ FREDAGEN PÅ FESTIVALEN.

Har plass til fleire
I år blei det fleire turar på Joker-butikken for å henta proviant, grillen gjekk for fullt med mat til både dei som var innom og dei som budde i dei rundt 40 telta på "drus kæmp".

- Vi gjekk tom for band, så dei siste som løyste billett fekk band frå i fjor rundt armen.

Det er mengda vakter som regulerer kor mange folk arrangørane tar inn kvar kveld.

- Området er stort nok til å ta imot fleire, men vi sette tak på rundt 600 per kveld. Til neste år legg vi nok til rette for endå fleire. Men vi skal ikkje veksa for mykje heller, det skal jo vera meir gøy enn stress, meiner Andreas.

10 sekund med opphaldsvêr
Fredag byrja det å bli fullt framfor scenen i 20-tida, før Lars Vaular gjekk på scenen. Laurdag regna det omtrent samanhengande heile dagen.

- Likevel kom det ein del folk, men dei kom litt seinare. Det var litt morosamt då Babe Rawlins gjekk på scenen litt før klokka 21, for akkurat då var det opphaldsvêr. "Vi tok sola med oss, og slik skal det bli resten av kvelden" sa vokalisten. Han rakk å syngja eitt vers før det hølja ned igjen.

Flotte musikalske opplevingar
Det var litt tynnare framfor scenen laurdagskvelden, men AC/DC-låtane til Riff Raff fekk for alvor opp dampen, og Null$katte$nylterne kommuniserte så godt med publikum at hadde det vore tak framfor scenen så hadde taket letta av responsen dei fekk.

- Vi blei litt forseinka laurdagen, så Karin Park kom på scenen etter midnatt. Mange sto igjen og fekk med seg starten på konserten, men kald og våt var det ein del som gjekk i teltet før det var ferdig. Park strålte likevel, med si fantastiske stemme var både unge og eldre svært nøgd.

Andreas seier han også var nøgd med han og William sitt meir spesielle stunt før festivalen.

- Svenske Djuret, som vi booka rett og slett fordi dei har kult bandnamn, var utruleg kule. Dei kom med tog om morgonen laurdag og var i backstagehuset heile dagen. Der fekk dei frukost og øl, og så jamma dei på orgelet som står der. Konserten var også svært bra.

Blei flau
Då midtsiden.no var på festivalen fredag var det mange nøgde ansikt å sjå, og mange som hadde fine ting å seia om "intimfestivalen".

- Vi fekk mykje skryt. Det er kjekt at folk er nøgde, men eg blei litt flau til slutt, innrømmer yngste Lindborg.

- Men samstundes er det viktig med tilbakemeldingar, både frå publikum og artistar, og alle artistane sa at dei hadde hatt det veldig kjekt, seier Andreas Lindborg.

Seinare i veka kjem vi med fleire bilde og film frå festivalen.