Skøyter | 14. nov. 2022

– Eg har framleis VM i siktet

Etter ein skuffande sesongstart har Sverre bestemt seg for å droppa alle konkurransar før jul.

VIL SYKLA MEIR: Sverre (t.h.), her saman med Peder Kongsvik, tar fri frå konkurransar for å trena meir. (Foto: Skøyteforbundet)
Kjetil Vasby Bruarøy
Kjetil Vasby Bruarøymandag 14. nov. 2022 17:26

«Ikke helt det jeg ønsket meg i dag. Skuffende, men det kan bare gå én vei herfra og jeg innser at jeg bare må være tålmodig! Takk til alle som heier!» skreiv Sverre Lunde Pedersen på Facebook etter verdscupopning på heimebane i Stavanger i helga.

Sverre kom på 11. plass av 25 deltakarar på 5.000 meter i divisjon B.

Då Midtsiden i dag tok kontakt for kommentar til formen og oppkøyringa, ba han oss venta nokre dagar, for det låg an til endringar i planane.

Droppar resten av konkurransane i år

Nokre timar seinare hadde han bestemt seg.

– I samråd med landslagsleiinga har eg bestemt meg for å stå over resten av konkurransane før jul. Eg kjenner at eg treng meir trening, og reiser til Gran Canaria for å sykla i to veker, seier Sverre til Midtsiden.

Det betyr at han mister både verdscup nummer to i nederlandske Heerenveen til helga, fire kontinenters turnering i Quebec 2. til 4. desember og verdscup 3 og 4 i Calgary dei to neste helgene.

– Sidan verdscup 3 og 4 går i Canada hadde familien frå før bestilt seg ein tur til varmen. No blir eg med dei for å trena i varmen.

Mister EM - har håp om VM

Når han droppar dei tre neste verdscupane mister han også sjansen til å kvalifisera seg til EM på Hamar 6. til 8. januar.

– Hovudmålet i år er VM. Det er ikkje gitt at eg tar ein av plassane, dei andre norske er gode om dagen. Men skal eg ha sjanse, så må eg trena meir.

– Kva har vore annleis med denne oppkøyringa?

– Eg byrja rolegare, grunna skaden i fjor, og så har eg hatt eit par sjukdomsperiodar i sommar og haust. Eg fekk nokre peikepinnar p testløp i Inzell tidlegare i haust, og fekk stadfesta at formen ikkje er god nok under verdscupen i helga.

– Spenninga var der, hovudet ville gå fort, men kroppen lystra ikkje.

– Har du vore med på liknande før?

– Ja. 2016-2017-sesongen. Då kjempa eg meg frå helg til helg, men det blei aldri bra.

– No kjenner eg meg sjølv betre, og eg kjenner at eg må ha nokre veker trening no, både for kroppen og det mentale sin del.

Sverre er spent på om han kjem tilbake til tidlegare toppnivå.

– Eg er 30 år no, og i min 14. sesong i senior verdscup. Eg håper at ikkje alderen hindrar meg, og vil jobba hardt dei neste vekene for å koma meg til VM.

Polen neste

Sverre og familien reiser til Gran Canaria om ei veke. Så skal han på isen igjen for å førebu seg vidare.

Verdscup 5 og 6 (sesongens siste) to helger midt i februar kan bli neste konkurranse for Sverre.

Helga 2. til 5. mars er det VM i Heerenveen.

Fleire gode norske

Sander Eitrem tok 1. plass i divisjon B, og gjekk over 17 sekund raskare enn Sverre, Sigurd Henriksen (ny personleg bestenotering) fekk 2. plass.

Patrick Roest vann divisjon A, beste norske var einaste norske i A-pulja, Hallgeir Engebråten på 6. plass.

Peder Kongshaug tok 4. plass på 1.500 meter (divisjon A).

Spennande? Vil du ha ukas høgdepunkt i innboksen?

Les meir om

Tilbod i november

Tilgang til alt innhald i 3 månadar for kun kr 300,-

Di støtte gir liv til lokalavisa vår.

  • Kun kr 300,- i 3 månadar
  • Tilgang til alt innhald
  • Utan bindingstid
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.