– Eg skal til OL!

Førre helg svømte Ariel Braathen inn til fire gull og to sølv under Stavanger TYR Open. Eit av dei halvårlege målepunkta ho nyttar for å sjekke korleis ho ligg an i høve målsettinga.

– Det gjekk veldig bra i Stavanger.

– Spesielt på 100 meter medley, som er den distansa eg trur eg vil satsa på, fortel den 14 år gamle havfrua.

Berre i tre og eit halv år

Dei første taka i konkurransebassenget tok ho så seint som for tre og eit halvt år sidan.

– Det var ein lærar eg hadde i fjerde klasse som spørte om eg hadde vurdert å byrja med å svømma.

– Det gjekk litt tid etter det før eg byrja, men då bror min starte, så fann eg ut at eg òg kunne freista, forklarar Ariel som starta i Os svømmeklubb.

Får att for turning og ballett

Då ho byrja på svømminga dreiv ho allereie med fotball, turn og ballett.

– Det blei eit fryktleg stress, så pappa sa eg måtte velja, og då blei det svømminga.

Likevel er ungjenta glad for at ho har gått på turn og ballett.

– Det trur eg har bidratt til at eg er ganske mjuk og god røyrsle i kroppen.

11 til 13 timer i veka

Etter at ho bestemte seg for å bli ein toppsvømmar har ho måtte ofra mykje.

– Det må du om du skal bli god og nå måla dine.

– Endel av venninnene mine tykkje eg trener ganske mykje, men eg må berre prioritera og heldigvis er dei flinke til å invitera meg i selskap og slikt når dei veit det passar, smiler Søftelandsjenta.

– Kor mykje og korleis ser treningsveka di ut då?

– Mandag er det mjølkesyre, tysdag langkøyring, onsdagar trenar eg med Delfana, det er harde økter med mellom 5-6000 meter, torsdager er det maxøkter, men ikkje så lange, fredager har eg løping med Kjersti Tysse Plätzer, laurdager har eg først langtrening så teknikk-trening med start og vendingar, sundager har eg fri, smiler Ariel, før ho legg til at det hendar det blir ein tur på Actic med pappa på sundagene.

Tilsaman utgjer øktene mellom 11 og 13 timer i veka.

Alex og Cameron

– Det var ein ung gut som 12-åring sa det same som deg, at han skulle til OL. Er det Aleksander Dale Oen som er forbildet?

– Ja, kjem det kontant.

– Han og Cameron Van der Burgh som vann 100 meter bryst i London-OL.

– Cameron møtte eg forresten under Bergen Swim Festival. Det var utruleg kjekt og inspirerande, smiler ho igjen, og smiler gjer ungjenta mykje.

– Du har Elin Austevoll og Thomas Harlem som trenarar i bassenget, korleis er dei?

– Dei er greie, men eg smiler ikkje alltid like mykje når Thomas "kjeftar" på meg frå bassengkanten.

– Men eg veit jo at det eigentleg er fordi han berre vil hjelpa meg til å bli betre, men det er ikkje så enkelt å hugse på når ein er sliten midt i ei hard økt.

Nettopp det å ta i det lille ekstra er nettopp styrka til Ariel skal ein tru mor Britt.

– Når ho er halvvegs i ei økt med 20 x 50 meter og dei andre byrjer å bli slitne og gå opp i rundetider, så skjer det motsette med Ariel. Ho senker tidene sine, forklarar mora.

– Det er fordi eg berre vil bli fortest mogleg ferdig det, skyt Ariel inn.

NM - EM - OL

Det første målet for ungjenta er Nordsjøstemnet i Stavanger i november.

– Det er eit stort internasjonalt stemne. Der håpar eg å gjera det skarpt og kvalifisere meg til NM til neste år.

– Eg har lagt ein plan som seier at eg skal nå NM til neste år, EM om to år og OL om tre.

– Kva om du ikkje kvalifiserar til OL i 2016 då?

– Då klarar eg det i 2020, avsluttar talentet bestemt på veg inn i Osbadet for nok ei økt i bassenget på veg mot det store målet.