Ein del festrelatert bråk i sentrum

Klokka 01.25 natt til søndag rykte politiet ut på melding om fleire fulle personar som lagde trøbbel på nattopen 7 Eleven i Byvegen.

Då patruljen kom fram hadde det som blir skildra som verstingane gått frå staden.

Men rundt klokka 03 kom det ny melding frå den nattopne kiosken.

– Det var ein mann i slutten av 20-åra som dei ikkje fekk kontakt med. Ambulanse blei også tilkalla. Dei sjekka personen, og alt gjekk greit. Vedkomande blei dimittert på staden.

Fekk åtvaring mot urinering

Klokka 01.17 blei ein annan mann i 20-åra observert ein stad der han «mogleg hadde urinert» på offentleg stad.

Han slapp unna med ei åtvaring, og sparte dermed 6.000 kroner.

Sjå liste over forelegg du kan få for ulike typar lovbrot:

Les òg– Det er gratis å oppføra seg

To menn vist vekk frå Os sentrum

I 04-tida, altså ein time etter at skjenkinga stengte på nattklubben Catten, sto ein mann utanfor og lagde bråk.

Politiet kom til staden og gav vedkomande pålegg omå halda seg vekke frå Os sentrum til klokka 08 i dag.

Også ein annan mann, som er i 40-åra, blei viste vekk. Han fekk pålegg om å halda seg vekke til klokka 12, og kan med andre ord gløyma å gå i gudsteneste i dag.

Blokkerte inngangsdør med bosspann

Tidlegare på natta, rett over midnatt, blei politiet kontakta av ein mann som bur nord for Os sentrum.

Han fortalte at nokre ungdomar hadde ringt på, men då han skulle opna døra var denne blokkert av eit bosspann.

Ein patrulje køyrde til staden, men utan å møta ungdomar i nærområdet.

– Vi har notert oss nabolaget som ein klagestad, og kjem til å patruljera der ein del framover, seier Lyssand.