Eplekjekk siger i ølbryggekonkurransen

I fjor fekk han heiderspris, i år brukte Kent Eric «Eplekjekk» Solberg rett type gjær.

Kent Eric S. Solberg fekk heider i fjor og vann i år. Her snuser han på litt Hansa. (Privat foto)
Kjetil Vasby Bruarøy
Kjetil Vasby Bruarøytorsdag 09. juli 2020 12:30

Årets ølfestival på Oseana blei avlyst grunna korona, men heimebryggarkonkurransen blei gjennomført.

No er vinnaren kåra; Johnny Eplekjekk, også kalla Kent Eric Solberg, stakk av med førsteplassen for ølet «Snabelsaft v.2».

– Dette var fantastisk kjekt, seier Kent Eric til Midtsiden.

Han er ganske fersk som heimebryggar, med start i 2018, men fekk positiv merksemd allereie i fjor.

– Då var oppgåva å laga american pale ale, og det å bruka amerikansk gjær var eit krav. Eg brukte norsk gjær, men juryen likte ølet så godt at dei gav meg ein pris likevel, ein heiderspris.

Kjell Magne Folgerø Hjelle vann i fjor.

– Eg sa til Kjell Magne at eg skulle slå han neste år, og det klarte eg, seier Solberg i eplekjekk stil.

I år fekk han ros for blant anna bruken av gjær.

«Ekstremt høg drikkbarheit»

«Vinnarølet var eit smaksrikt men velbalansert øl som med lekre frukttonar frå både humle og gjær lett kan nytast utover ein lang sommarkveld. Ølet er og gjæra på kveik, ekstra artig for oss som brenn for øltradisjonar» skriv jurysjef Tarjei Øiestad Skeie om ølet.

Han fortel at det var åtte deltakarar i år.

– Mellom mykje friskt og godt øl skilte vinnarølet seg ut grunna god balanse mellom ingrediensar og gjæringspreg, og ekstremt høg drikkbarheit, seier Skeie til Midtsiden.

Ølet var brygga på ei gamal, norsk gjærstamme brukt i gardsbrygging, som har kome meir i ålmenn bruk dei siste åra.

Lageret er tomt

Kent fortel at det var kameratar som lokka han inn i den nye hobbyen.

– Etter å ha vore med og smaka på andre sitt øl fleire seine kveldar, var det på tide å kjøpa seg utstyr. No brygger vi litt saman og litt kvar for oss.

Til saman har det blitt 48 «batchar» med øl. Solberg fortel at ingen har gått i vasken til no, og at han sjølv har Snabelsaft v.2 som ein av favorittane.

Den ekstreme drikkbarheita som juryen skildrar, er reell.

– Eg har faktisk drukke opp alt. Men eg har naturlegvis oppskrifta liggande, så det skal lagast meir!

– Namnet på ølet kan kanskje tolkast i retning noko som ikkje er like innbydande. Kvar kjem det frå?

– Å. Det er berre frå ein intern greie på jobb, med ein som stadig fyller vannflaska si. Så terga vi han litt for snabelvatn, som blei til snabelsaft, og vidare til ølet Snabelsaft v.2.

Håper på full festival neste år

Oseana er takksame for at Tarjei Skeie har tatt på seg å gjennomføra heimebryggkonkurransen, trass avlyst ølfestival.

I juni måtte han dessverre òg vera med på å legga ned Bjørnafjorden Bryggeri.

– Vi satsar på å vera tilbake med ølfestival og ny heimebryggarkonkurranse i 2021. Og vi ønskjer framleis å ha med oss Tarje Skeie og Cato Larsen i det vidare arbeidet, seier Veronica S. Halhjem frå Oseana.

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.