Er «orkanen» over?

I samband med at det var meldt liten kuling frå torsdag til fredag, fortalte Bergens Tidende at det kunne koma orkan i kasta.

Meteorolog Martin Granerød meinte at lause gjenstandar burde bli tatt under tak, men dei som eventuelt har demontert trampolina si før torsdag føler gjerne at det var bortkasta tid.

Vinden har skapt få vanskar og er no avtatt.

– Vi har hatt få meldingar som kan ha med vêret å gjera, seier varabrannsjef Arne Monsen.

Stort tre i sjøen i Hatvika

I 20.30-tida i går fekk dei melding frå mannskapen om bord i arbeidsbåten Fox Challanger, som hadde tatt hand om eit stort tre som låg i sjøen i innseglinga til ferjekaien på Hatvik.

– Dei la det på land og vi kappa det opp og fekk det fjerna i tilhengar.

Båt gjekk ned

Fredag morgon fekk brannvesenet melding om ein båt som hadde gått ned.

– Det var ein liten båt med motor som hadde gått ned i nærleiken av Oselvarnaustet.

Regn og kulde, men svak vind

Vindstyrken skal halda seg på 1-2 m/s gjennom helga.

Det er meldt 10-11 gradar og regn den komande veka, men med solgløtt laurdag.