– Er så gøy!

Saman med Senioruniversitetet, Os kommune og GC Rieberfondene inviterar Oseana måndag til det første seniortreffet i Oseanasalen med Bettina Husebø, lege og leiar ved Senter for alders- og sykehjemsmedisin ved universitetet i Bergen som foredraghaldar og Helge Jordal med Harald Dahlstrøm som kulturelt innslag.

– Interessa har vore heilt enorm.

– Det er så gøy, jublar ein entusiastisk Oseanadirektør Ole-Tobias Lindeberg.

Tak på 300

Vel 250 billetter er selde allereie ei veke før arrangementet.

– Vi har faktisk sett oss nøydde til å setja eit tak på 300, så det gjeld å vera om seg om ein ikkje skal gå glipp av dette.

Arrangementet er finansiert med bidrag frå GC Rieberfondene og ein del av det samfunnsansvaret Lindeberg og Oseana ønskjer å ta.

– Det at vi kan bruke huset ein måndag formiddag til eit fagleg foredrag og kulturelt innslag er noko av det eg håpa å få til då eg starta.

– Men det viktigaste med seniortreffa er kanskje det sosiale.

– Vi ønskjer å vera ein møteplass i tillegg til å gje eit kvalitativt godt innhold, fortel Lindeberg.

Noko utanom det vanlege

Lindeberg er oppglødd av tilbakemeldingane han har fått i forkant av måndagens foredrag og kulturelle innslag.

– Ein skulle kanskje tru at Helge Jordal var den som trakk publikum, men tilbakemeldingane tydar like mykje på at det er Bettina Husebø som gjer det.

– Det at vi har fått ein annerkjent internasjonal forskar som Husebø til å helde foredrag trur eg vil vera med på å gi det fyrste seniortreffet ein ekstra dybde og eit ekstraordinært foredrag utanom det vanlege, seier Lindeberg.

Målet for prosjektet er å gje seniorar, pårørande og andre interesserte informasjon, vegleiing og oppleving til glede og nytte for alderdomen.

Måndagens treff er det første av tre treff denne våren.