– Er tru mot originalen

Framsyninga er den klassiske Annie-framsyninga som først blei sett opp på Alvin teateret på Broadway i 1977 og seinare filmatisert i 1982.

- Vi har vore tru mot manuskriptet og freista å halde kostymane så nær opptil originalen slik at publikum blir sett tilbake til 1930-talet som historia er lagt til, fortel Marianne Juvik Sæbø frå Musikalhuset på Askøy.

Som originalen varar framsyninga i omlag to og ein halv time med ei pause midtvegs.

- Vi trudde den ville vara ein og ein halv time, men då vi sette den samen såg vi fort vi gjekk på ein smell, ler produsenten.

Annie frå Os

Heile 20 ungar og eit ti-tals vaksne er med på scena for å gje publikummet den musikalske opplevinga.

- Det er ei semiproff oppsetting kor vi nyttar både amatørar og profesjonelle skodespelarar og sangarar.

- Då vi hadde audition i januar var det to jenter som raskt peika seg ut som Annie. Dei to, Camille Rød og Celine Gjevik, spelar hovudrolla i annankvar framsyning.

- Camille, som er frå Os, kjem til å spele fredag når vi har premiera her på Os, fortel Sæbø.

Fulle hus på Askøy

Musikalhuset har spelt fem fulle hus på Askøy før dei no tek med seg musikalen til Oseana.

- Vi har fått ei eventyrleg mottaking med utruleg bra respons.

- Det som har imponert folk mest er den spelegleda, spesielt ungane har vist på scena, men lokalet på Askøy er såpass lite at vi såg det ikkje som teneleg å settje opp ekstraframsyningar der ute, forklarar ei ærleg Sæbø, før ho legg til at Askøyværingar som ikkje fekk billettar lokalt tek turen til Os for å få med seg framsyninga.

- Blant anna hadde eg ein telefon frå ei bestemor som fortalde at "då tek eg med barnebarna til Os", når ho fekk vete at det ikkje blei ekstraframsyning.

God mottaking på Amfi

I samband med prisfestdagane på Amfi førre veke vitja nokre av ungane senteret og spelte utdrag frå framsyninga.

- Det blei ei veldig positiv oppleving med mykje folk og god respons, fortel scenograf Ann Sofie Jonsson som gler seg til å få visa heile musikalen i storstova.

- Vi har gledd oss heilt sidan vi starta øvingane rett etter ferien å få koma til Os for å spela i eit skikkeleg kulturhus, skyt produsenten inn, samstundes som ho innrømmar at det har vore litt trangt og kummeleg i ungdomshuset på Florvåg.

Annie spelast fredag og laurdag. Det er framleis nokre få billettar igjen til den klassiske barnemusikalen.