Linda med dei to diplomane Er-An Veikro har frå før. No er ein tredje på veg. (Privat foto)

Er-An Veikro på topp 10 i Noreg

NAF-magasinet Motor rangerer nok ein gong kroa blant dei beste. Linda vil likevel ta enkelte grep.

Av: Kjetil Vasby Bruarøy

For fjerde år på rad har Motor kåra «Årets veimat». Dei har sjekka nærmare 100 restaurantar mellom Nordkapp og Lindesnes. Årets vinnar er Sanngrund Servering & Overnatting på riksvei 16 mellom Oslo og Kongsvinger.

Er-An Veikro på E39 på Røykenes har vore finalist 3 av dei 4 åra, blir rangert som best i Hordaland og er på topp 10 i Noreg.

– Vi har mange tilreisande og gjennomreisande som besøker oss, og NAF-magasinet Motor er eit stort og viktig magasin for mange av våre potensielle kundar, seier Linda Andersen frå Er-An Veikro.

Vil alltid bli betre

Er-An Veikro plasserte seg på 10. plass av dei 10 nominerte.

– I travle kvardagar er denne testen med på å hjelpa oss til å halda oss skjerpa, å heile tida prøva å bli betre.

Linda gler seg over at testenblir gjennomført grundig - og at karakterane blir begrunna.

– Det er veldig kjekt å få 10 av 10 på service, og at dei nemner at testen blei gjennomført på tampen av ein travel dag, men at det likevel var god betjening og reint og ryddig.

– Samtidig er eg ikkje mindre konkurransemenneske enn at eg irriterer meg over å få 8 av 10 der eg meiner vi fortener betre, seier ho og ler.

Styrker bestseljar med brød frå Hagavik

Kandidatane blir vurderte innan ti område. Svakaste karakter Er-An har fått er 7 av 10, og det fekk dei på inn- og utkjørsle, noko dei ikkje kan gjera noko med, og på smak, grunna lite spennande smak på dressingen på den eine burgeren. Der har dei allereie har gjort justeringar.

– Testen blei gjennomført i februar, i mai hadde vi nokre justeringar på burgerane våre, som blant anna blei supplerte med nye dressingar og heimelaga salat. Og vi lanserte ein ny, Bikers Burger. Dette var før vi hadde lese dommen frå Motor.

• Du kan lesa meir om kåringa og heile omtalen av Er-An Veikro på Motor.no

– Vi får kommentar i testen på at hamburgerbrødet ikkje er heimelaga. Vi har 6 ulike restaurantburgerar på menyen, med ulik smak, og sel 1200 til 1500 burgerar i veka. Vi har ikkje sjanse til å baka så mange brød sjølv. Men vi har nyleg hatt grundig vurdering av leverandørar og nye oppskrifter, og har nettopp skifta til Hagavik Hjemmebakeri, som har tilpassa burgerbrød til oss. Første levering får vi i dag!

– Du er ikkje redd for å tulla for mykje med bestseljarane dine?

– Vi har vore varsame, og alt er til det betre, lover Linda.

I mai feira restauranten, som starta som ein liten kiosk, 25-årsjubileet sitt. Neste arrangement er markering av den amerikanske nasjonaldagen onsdag 4. juli, som vanleg med amcarkortesje gjennom Osbygda med start og stopp på Røykenes, og konkurranse i burning.

Fleire saker