Fann pose med narkotika

Politiet fekk i morgontimene overlevert ein lynlåspose med kvitt pulver frå ein vakt på Empire.

– Det var i seks-tida i dag tidlig at ein vakt på utestaden Empire kontakta patruljen. Han hadde funne ein liten lynlåspose med noko kvitt pulver som truleg er narkotika. Posen blei funnen rett innanfor døra på utestaden. Vi har ikkje knytt posen til personar, så den vil bli tatt hand om og destruert av politiet, fortel operasjonsleiar Frode Kolltveit ved Vest politidistrikt.

Overstadig berusa

Tidlegare på natta måtte politiet ta hand om ein overstadig berusa person i Os sentrum.

– Det var ein 18-åring som patrulja måtte ta hand om. Foreldra blei kontakta og overtok ansvaret for han.

To på moped

I fire-tida natt til laurdag fekk politiet melding om to personar på ein moped ved Halhjem kafé.

– Meldinga kom frå området ved Halhjem kafé/Torkjelvegen. Det skal ha vore ein gut og ei jente på mopeden. Dei køyrde uten hjelm og noko uvørent. Patrulja var ute og såg etter dei, men traff ikkje på dei, fortel Kolltveit.