Feiring av "ny" skule i Dalen
VIDEO: Hegglandsdalen skule har vore under oppussing sidan i januar. I går var det offisiell opning med kåseri, dans og song.
Bildeserie:
– Prosessen har gått veldig fint. Vi hadde starta med å tøma lokala før byggestart andre veka i januar, så blei administrasjonen tatt først og dei nye inngangspartia sist.
– Ungane var ein smule mållause då dei kom til skulestart i august, fortel rektor Jarle Reppen.
Skulen trengte betre inneklima, men fekk full ominnreiing med på kjøpet.
– Administrasjonen låg ikkje så praktisk plassert, midt mellom inngangsparti, skuleplass, gang og klasserom. No er den flytta til motsett ende av skulen samtidig som vi har fått fleire nye rom.
Foreldre bygde sløydsal
Det er ikkje berre lærarane som har fått betre arbeidsvilkår.
Nye garderobar sørgjer for at det ikkje heng klede i gangen utanfor klasseromma, dei nye toaletta har inngang frå innsida, i staden for på utsida av skulen, heimkunnskapen har blitt ny og i kjellaren er eit tidlegare uinnreia lager blitt kledd inn som sløydsal.
– Tidlegare hadde vi berre nokre sløydbenkar på biblioteket, det var ikkje sånn det burde vera. Men så tok foreldre tak, vi har mange nevenyttige folk i Hegglandsdalen, og snekra opp med tak, veggar, golv og nye vindauge.
– Materialar fekk dei av kommunen, verktøy fekk dei låna av byggmeister Aarvik, som sto for sjølve ombygginga.
Fortalte om 56-åringen
Tysdag 11. september heldt skulen offisiell opning, først på dagtid, så på kveldstid. På dagtid var det flest besteforeldre og oldeforeldre, og dei fekk saman med skuleungane høyra Åsmund Lien kåsere om gamledagar og nyedagar i Hegglandsdalen.
Lien fortalte om stovene han gjekk på skule i, om den første skulen og om dagens skule, som blei bygd i 1956. Interessa frå elevane var kanskje størst rundt dette med utedass på gamleskulen, sjølv om dei først trudde skuret Åsmund peikte på var gymsalen.
Skuleskyss og undervising
Lien viste også skulebilde av alle elevane i Dalen i 1899. Der var kanskje fleire elevar enn kva ein skulle tru. Og han fortalte om Olav Skorpen, som var lærar ved skulen frå 1905 til 1947.
– Skorpen sto for oppdraginga av to generasjonar hegglandsdølar, sa Åsmund.
I 1959 blei Lønningdal del av skulekrinsen og det kom plutseleg elevar med behov for skuleskyss.
– Kirsten "Kiss" Lønningdal sto for transporten, ei oppgåve ho hadde i cirka 50 år.
Testa piano-gåva
Etter kåseriet var det to innslag av dans av elevane, etter musikk av Shakira og Erik og Kriss.
Så var det song og Hegglandsdalen skule fekk testa det elektroniske pianoet skulen fekk i gåve av Os kommune.
VIDEO: Sjå delar av opningsfesten tysdag. (Foto: Kjetil Vasby Bruarøy)
Spennande? Vil du ha ukas høgdepunkt i innboksen?
Les meir om
Last ned Midtsiden-appen idag
No kan du følgja nyhende frå Os - rett i appen.
- Gratis å lasta ned
- Bli varsla straks noko skjer
- Tilgjengeleg i App Store og Google Play Store
For å få tilgang til alle sakene i appen må du vera abonnent.