I dag var det oppstart for elevane i grunnskulen. For Os barneskule, som opp gjennom åra har hatt ulike utfordringar med skulevegen - sto fleire nye for tur.
Landboden er stengt to stadar og på Byvegen nær skulen er det eine køyrefeltet stengt.
I tillegg er det hjulspor som viser at folk framleis køyrer gjennom skuleplassen, trass sperringa som blei sett opp i vår.
– Det visste eg ikkje! Vi blei lovd bom, no må vi anten få ein stein til eller denne bommen må på plass! sa rektor Laila Aarbakke til Midtsiden onsdag.
– Det overraskar meg at folk køyrer her, spesielt med tanke på at vi i vår var berre millimetrar i frå å ista ein førsteklassing då ein bil køyrde gjennom skuleplassen.
– Vi har hatt ferieopen SFO og det er ungar og leikar her på kveldstid. Dette kunne gått gale.
Tidlegare denne veka har ho sendt ut informasjon til foreldre, med kart der ho ønskjer at elevane skal gå.
I kartet kjem det fram at skulen ikkje ønskjer at elevar som kjem opp frå Byvegen skal gå opp ved Jordmorsvingen, men opp frå 7/Eleven og over fotgjengarfeltet i Giskavollen.
– Vi har sett ein del uheldige episodar, foreldre som ikkje ventar til dei er på haldeplassen før dei slepp av ungane, eller til og med set dei av omtrent i fart, midt i krysset, så elevane må vandra slalåm mellom andre bilar.
– Kvar rundt skulen er problemet størst?
– Det vi er mest opptatt av, er at folk ikkje passerer skiltet som viser innkøyring forbode, at dei kjem opp på skuleplassen.
Aarbakke har òg bedd fylkeskommunen stilla med ein vakt ved skulen, sidan trafikkforholda er ekstra krevjande.
– Det gjorde dei, og det fungerte veldig fint ved skulestart i dag, seier rektor torsdag.
Bildeserie:
Kommunen sitt arbeid i Landboden fører til stengt veg ulike stadar til ulike tidspunkt.
Noverande stenging, på to punkt, skal etter planen vera over i morgon, fredag.
