Fekk ikkje revansje
Lyngbø gav Os tøff match på Kuventræ i dag.
Bildeserie:
Søndag tok Os imot Lyngbø, laget dei gjekk på eit flaut 6-2-tap for på bortebane.
I dag såg det ut til å gå betre, i staden blei det sesongens første tap på heimebane.
Os - Lyngbø 1-2 (0-1)
Målskårarar: Jonas Hesvik (41.), Roar Vestbø (70.) og Fredrik F. Nilsen (87.)
Kort, Os: Christer Olsen gult (9.), John Ole Johannessen raudt (88.).
Os (4-3-3): Frode Øvredal - Stian Bakke (Ørjan Glesnes 83.), Torkel Hjertnes Emilis Zilinskas, John Ole Johannessen - Stian Lunde, Mats Lepsøe, Anders Kinden (Joakim Hovden 54.) - Roar Vestbø (Emil Halvér 83.), Erik Kanestrøm og Christer Olsen.
Os hadde stolpteskot, blei snytt for to straffar og fekk John Ole Johannessen utvist to minutt før ordinær tid. Christer blei saksa ned og halden fast av Lyngbø-keeper i første omgang. Her kunne det kanskje blitt blåst frispark til Lyngbø i forkant. I andre omgang hadde Stian Lunde sikta seg inn på ein corner, men blei skubba vekk då han var i ferd med å heada ballen i mål.
Johannessen fekk direkte raudt kort då han hindra Nilsen i å auka til 1-3 minuttet etter han skåra 1-2-målet. Frisparket til Lyngbø, frå rett utanfor 16-meteren, enda utanfor.
– Dette er ein kamp som kunne vippa begge vegar. Vi klarte ikkje å halda tempoet oppe i dag, og det blei ein del feilpasningar og ein litt rotete kamp, synest Jørn Vegard Berge.
Lyngbø lagde fleire store sjansar og fekk to skåringar annullert for offside. Éi av dei feilaktig, ifølgje Lyngbø-trenaren.
– Det blei ein tøff og underhaldande kamp, der vi var best siste halvtime av første omgang og Os best etter pause. Men eg føler vi hadde dei største sjansane og at det er greit at vi tar tre poeng, seier Lyngbø-trenar Helge Nilssen.
Karantene på Christer
Os måtte klara seg utan Børge Borgen (karantene) og Dani Bergstø (skade) i midtforsvaret. Emilis Zilinskas fekk med seg høgreback Torkel Hjertnes i midten. Hjertnes gjorde ein solid jobb og blei kåra til dagens beste Os-spelar.
– Eg synest heile bakre firar gjorde ein god jobb i dag. Vi plar slita mot lag med to spissar, og Lyngbø har to raske. Men bortsett frå nokre litt halvhjarta klareringar blei det bra i dag, synest Berge.
Moldskred har som kjent gått frå Os til Kongsvinger og Kanestrøm fekk tilbake plassen sin på kant. I dag blei det både frispark rett på keeper og stolpeskot på Kanestrøm, som også blei spelt fri av Olsen, men missa.
Anders Kinden tok Kanestrøm sin plass på midtbanen.
Olsen fekk gult kort i 9. minutt og må stå over neste kamp, som går borte mot Haugesund 2.
Os ligg no på 4. plass på tabellen, 8 poeng frå toppen.