Fekk revansje over Sandviken

Os vann generalprøven før NM 1-2 over Bjarg, der alle mål var på straffe.

Det blei NM-exit førre helg og ny treningskamp i går, den siste før seriestart neste helg.

Også denne hadde tre straffeskåringar. Kampen gjekk mot Sandviken, som Os henta seg nesten inn igjen mot i treningskamp tidlegare i juli, frå 3-0 til 3-2 borte.

Denne gong var det Os som fekk ei tremålsleiing.

– Vi hadde ein veldig god første omgang, der vi lykkast både med frispeling og å spela Sandviken låge, seier spelande assistenttrenar Torkel Hjertnes.

I Endre Brenne sitt fråvær leia han laget saman med Zsolt Korcsmár.

– Rune Mo gav oss leiinga etter eit veldig flott angrep der vi spelte Sandviken heilt ut. Anders Havsgård auka til 2-0 på eit flott skot frå utsida av 16-meteren.

Os gjekk opp i 3-0 og 4-1 på straffe. Sandviken sitt første mål kom også på straffe.

– I andre omgang sto Sandviken høgare, og vi fekk nokre brot imot. Vi mista ballen litt for lett, og klarte ikkje å etablera noko særleg med spel på deira banehalvdel.

– Vi hadde kvar vår omgang, men dominerte samla sett, og tok ein kjekk siger før seriestart.

Treningskamp laurdag 31. juli:
Os - Sandviken 4-2 (3-0)

Målskårarar, Os: Rune Johan Åsheim Mo, Anders Hjelle Havsgård, Thomas Spilde og Roger Ekeland

Os: Kasper Færøvik - Anders Havsgård, Carl William Lafquist-Lygre, David Cardenas, Torgeir Lunde - Kristian Halvorsen, Rafael Villén, Kristoffer Røttingen - Roger Ekeland, Thomas Spilde og Rune Mo

Innbytarar med speletid: Sander Kvittingen, Sander Dyngeland, Torkel Hjertnes, Tobias Nøss, Sverre Spangelo Haga og Sebastian Plätzer.

Marius Mikkelsen, Niklas Lunde Fosen og Zsolt Korcsmár er ute med skade.

– Niklas fekk ein skade i lysken i NM-kampen, og blir dessverre ute eit par veker, fortel Hjertnes.

Os tar imot Oslo-klubben Ready laurdag til kampstart klokka 14. Ready speler i dag NM-kamp mot Strømsgodset.