Fekk trøystande ord frå ukjent avsendar

Fleire naboar i Oshaugen og Eikevegen har denne veka fått ei varm helsing i postkassen.

«Alt blir bra» står det i brevet, som er dekorert med ein regnboge.

– Det var så gode ord og så fin regnboge at eg gret då eg såg det, fortel Jennifer Martin.

Ho visste ikkje kven det kom frå, men fekk mistanken stadfesta i går. Nabojentene Kaja Emilie (7) og Ine Marie (5) har laga brev til nesten heile nabolaget.

– Det byrja med at vi ville laga ei helsing til oldemødrene. Jentene skreiv brev, og det blei så godt mottatt at det gav meirsmak, fortel mamma Nina Therese Nesbø.

Då blei det brev også til besteforeldra, og seinare; til naboane.

– Det er jo så kjekt med brev, og vi har fått brev tilbake.

– Vi har hatt det overraskande bra gjennom koronasituasjonen, med heimekontor og heimeskule, og leik inne og ute. Då er det eit fint avbrekk å senda nokre trøystande ord til andre, som kanskje er lei av situasjonen eller sit åleine.