Festleg på Moldegaard

Bildeserie:

1 av 10

Kvart år, i starten av juni, blir sommaren innvia med open parkfest med gratiskonsert i parken på Moldegaard.

Under dagens konsert var vêret såpass grått og vått at arrangørane valde å flytta konserten inn i gartneriet.

På få timar hadde dei lagt ut presenningar på bakken, og satt inn benkar i det som til dagleg vert nytta som ridehall.

Eit stort publikum, mange kledde i turklede, såg ut til å gleda seg til gratiskonsert med Eikanger-Bjørsvik Musikklag.

Osøyro Kolonial var òg i «salen», og kunne by på fleire typar kaffi og lette matrettar.

Høgaste nivå frå regjerande Europameistrar

Og konsert vart det!

Eikanger-Bjørsvik Musikklag er ikkje berre eitt av dei beste brassbanda i Noreg - dei vann noregsmeisterskapen for 19. gong i februar i år, og dei dei er regjeranda Europameistrar.

Publikum fekk i løpet av den timeslange konserten høyra kjende melodiar som «New York, New York», «What A Wonderful World», vidare til filmmusikken frå «Flåklypa Grand Prix» og «Hjortejegeren» til store, svingande jazzverk frå Glenn Miller og Gordon Goodwind.

Leia av dirigent Reid Gilje vart konserten med Eikanger-Bjørsvik Musikklag ei oppvisning i kva som skjer om du øver.

Mykje.

Musikarane hausta ståande applaus då konserten var ferdig, og dei slapp ikkje unna før dei hadde spelt eit ekstranummer for det musikkglade publikummet på Moldegaard.

15.000 til Nore Neset Grendalag

Til å dela ut årets tildeling frå «Moldegaardsfondet til Osbygdens Vel» stilte ordførar Terje Søviknes.

Han kunne avsløra at årets tildeling skulle til Nore Neset, og Nore Neset Grendalag.

Susan Askvik tok på vegne av grendalaget i mot 15.000 kroner som skal nyttast til å oppgradera lydanlegget i i aktivitetshuset.

Stifta av Mowinckel «til Osbygdens gagn og forskjønnelse»

«Moldegaardsfondet til Osbygdens Vel» blei etablert av Johan Ludwig Mowinckel (1870-1943) 18. august 1930, og var med på å få realisert Os Gamleheim (teikna av arkitekt Bull), som sto ferdig i 1932.

Statsminister Mowinckel forklarte gjevargleda si til Os på denne måten; «Den sosiale pliktfølelsen i vårt folk er sterk og i gledelig vekst. Den drivkraft som følger med jord og en eiendom - i vårt tilfelle Moldegaard – knytter oss sterkt til Osbygden og gjør det naturlig for oss å hjelpe».

Fondet har statuttar frå 1935. Her står det blant anna at ordførar i Os kommune saman med eigar av Moldegaard skal sitja i styret.

Moldegaardfondet skal tilgodesjå oppgåver «til Osbygdens gagn og forskjønnelse». Fondet har gjeve støtte til alt frå Nils Tveit si «Os Soga» til skulekorps, ungdomslag og Oselvarverkstaden.