– Fleire som tjuvstarta
I dag klokka 8 gjekk dei første (lovlege) hummarteinene i sjøen. I går skal det ha vore fleire som tjuvstarta. (Oppdatert)
Frå svenskegrensa til og med Sogn og Fjordane er det lov å fiska hummar frå 1. oktober til og med 30. november (nord for Sogn og Fjordane er det lov å fiska fram til og med 31. desember).
Men hummarfisket startar i det teina går i sjøen, det var med andre ord ikkje lov å setja teiner etter hummar før klokka 8 i dag.
– Utanfor moloen på Steinneset var det 10-15 blåser søndag kveld, fortel ein turgåar til Midtsiden.no.
– Dette er ein populær plass, og det er sjølvsagt mogleg at nokon sette ut stein med tau og blåse i for å "reservera" plassane til måndag morgon, men eg tvilar. Dette ser ut som ulovleg tjuvstart.
Politiet har ikkje fått inn tips i saka.
– Vi har verken fått meldingar om ulovleg fiske eller hatt nokre aktivitetar retta mot hummarfiske i dag, seier politibetjent Tom Johannessen.
OPPDATERT: Havforskningsinstituttet skal ifølgje ein hummarfiskar i Os har utført prøvefiske utanfor Os hamn. Teinene utanfor Steinneset skal vera blant dei forskarane har fiska med.
Les detaljerte reglar på fiskeridir.no.
Les òg: Fetrar med flaks