Følg draumen på Nore Neset

Bjørnefjorden utdanningsmesse såg dagens lys for første gong i fjor haust. No er eldsjelene i Os Lions Club klare for på ny å gje elevar på ungdomsskulane og dei vidaregåande skulane hjelp til å finna fram i "utdanningsjungelen".

– Mellom 90 og 95% av utstillarane i fjor er med oss vidare.

– I tillegg har det kome fleire nye til, så når vi i år bikker 60 utstillarar, så er nok det taket for kor mange vi kan ta inn i Nore Neset Aktivitetshus, fortel Paul Irgens-Hagevik, medlem i messekomiteen.

Tysdag startar dei rigginga av messa, godt hjulpen av dugnadsgjengen på Nore Neset Aktivitetshus.

– Dei er til uvurderleg hjelp, smiler Irgens-Hagevik.

Fleire store

Arrangøren fortel om gode tilbakemeldingar frå messe i fjor.

– Eg har inntrykk av at både utstillarane og skulane var nøgde.

– Eit prov på det er kanskje at store firma som Aker Solutions, Kværner Stord, DOF og Tide finn tid til å delta.

– I tillegg er skulane ivrige. 10. klassingane har allereie fått messeavisa og har førebudd seg når dei har hatt utdanningsval på skuleplanen.

Bussar frå aust og vest

For å få alle elevane til messa har arrangørane satt opp transport frå skulane til messa og tilbake att.

– I tillegg til skulane i Os har vi ordna skyss for elevane frå Fusa, Tysnes og Austevoll.

– Dei to siste hentar vi på ferjekaia på Halhjem og Krokeide for å frakta dei til Nore Neset.

– Det trur eg er eit sukesskritere for å få messa til å bli vellukka.

Ope for foreldre og andre

Messearangørane håpar at også foreldre, føresette og andre intresserte tek turen til Nore Neset.

– Frå klokka 17 til 19 onsdag er messa opne for alle.

– Eg håpar jo at foreldra tek turen, gjerne saman med ungane sine.

– Det er vanskelege val ungane skal ta i høve til utdanninga, og då er støtta heimefrå viktig.

Foredrag om ungdom og rus

Også i fjor tilbydde arrangørane foredrag på kveldstid, då knytt opp mot utdanning og entreprenørskap.

– I år har vi vald ei litt anna løysing.

– Anne Lyssand, som jobbar med førebyggande arbeid på Os lensmannskontor kjem og held foredrag om "Ungdom og Rus".

– Eg er trygg på at det er eit foredrag som kan vera interessant for dei fleste og håpar mange finn vegen til Symrasalen onsdag kveld, avsluttar Paul Irgens-Hagevik.