Førarkortbeslag etter kollisjon på Haugland
Ei eldre kvinne og ein kjendis kolliderte på E39 laurdag.
Laurdag i 12.30-tida kolliderte to bilar på E39. Uhellet skjedde i krysset mellom Halhjemsvegen og Reset.
Tre personar var involvert, ein av dei blei tatt til legevakt for sjekk.
Det blei først full stopp og så manuell dirigering, med køar i over ein time etter samanstøyten.
– Den eine bilen hadde retning Halhjem, den andre køyrde ut frå Reset, fortel politibetjent Sindre Hallem i dag.
Eggum rakk konserten likevel
Det har seinare blitt kjent at Porschen som hadde retning Halhjem blei køyrd av den kjente musikaren Jan Eggum.
– Min nyanskaffa Porsche 911 må på rehab, men eg klarer likevel å nå den utselte konserten min i Haugesund, seier Eggum sjølv til Se & Hør.
Beslag i førarkort
Bilen som kom ut frå Reset blei køyrd av ei kvinne fødd på 1940-talet.
Politiet har tatt beslag i førarkortet hennar.
– Vi mistenker brot på vikeplikta, seier Hallem.
– Men vi har fleire vitne å ta avhøyr av, så saka er ikkje ferdig etterforska.
– Det er eit uoversikteleg kryss å koma seg ut frå, særleg retning Halhjem, altså om bilar kjem motsett veg på E39.
