Forfattar og kokk til Os for å snakka om hage

«Frå hage til mage» er tema når Anders Totland kjem til Os for å halda foredrag.

Os Hagelag er vertsskap, og har invitert journalisten, forfattaren og kokken Totland til foredrag i Tunet i Os sentrum.

Blogg og bok

Då Anders Totland flytta inn i hus med hage sommaren 2011, saman med familien, blei det eit prosjekt: Alt som vaks i hagen, som ikkje kunne etast, skulle vekk.

I staden fekk han inn nye frukttre og bærbuskar, og store deler av hagen blei gjort om til kjøkenhage, med urter og grønsaker og anna godt som kan etast.

Prosjektet blei dokumentert på bloggen «Frå hage til mage», som også er utgangspunktet for foredraget med same namn – der den prisløna forfattaren og journalisten òg snakkar om kokeboka «Digg - gjer kvardagen til ein fest», som kom ut hausten 2017.

Debuterte i 2017

Anders Totland (31) er oppvaksen på Bømlo og har fått fleire prisar for god journalistikk i lokalavisa Sunnhordland.

Han debuterte som forfattar med barneboka «Vampyrane i Eplehagen» på Kapabel Forlag i 2015.

Våren 2016 kom ungdomsboka «Engel i snøen» på Gyldendal Norsk Forlag, som han vann Nynorsk barnelitteraturpris for.