Formar ny ferjemeny

Veronica kritiserte ferjemenyen på eigen blogg. No er ho invitert til å vera med å forma ny meny.

Kjetil Vasby Bruarøyfredag 11. feb. 2011 13:05

- Vi set opp to referansegrupper, éi med tilsette og éi med kundar. I gruppa for kunder er det naturleg å ta med engasjerte personar, og Veronica er heilt klart i den kategorien, seier marknadssjef i Fjord1, Gunn Aase Moldestad til Midtsiden.no.

If you can´t beat them ...
I november skreiv vi om den tilflytta osingen, bloggaren og journalisten Veronica Simone Fjeld, som hadde fått helsing frå Fjord1-direktør Leif Øverland etter at ho blogga om maten om bord på ferjene mellom Os og Stavanger.

Onsdag blei ho invitert med i gruppa som skal forma den nye ferjemenyen.

- Fjord1 ser verkeleg ut til å ta dette på alvor. At dei inviterer meg med viser også at dei ser stort på det, at dei vil ha ærlege tilbakemeldingar frå kresne kundar, seier Veronica på Halhjem ferjekai i dag.

- Stort engasjement
Moldestad fortel om omfattande brukarundersøkingar hos kundane og i fylka ferjene deira har trafikk i.

- Responsen har også vore god, vi får tydelege tilbakemeldingar om kva mat folk vil ha når dei er på reise.

Ho forsikrar at referansegruppene ikkje berre skal vera eit smakspanel, men del av heile prosessen, i alt frå diskusjonar om utval til innpakking og marknadsføring.

- Kva vil de ha, osingar?
Veronica foreslår betre råvarer på eksisterande rettar, som omelett og karbonader, og større utval av smårettar og varm-mat som toler å stå litt.

- Dei har biff stroganof om bord, men slike rettar blir fort dårlege. Då er det betre med chili con carne, som blir betre desse lengre den står.

- Og så saknar eg smårettar, supper, salatar og nudlar, for eksempel.

Ho er også opptatt av at også andre sine ønske skal bli oppfylt.

- Kommenter denne saka om kva de vil ha på menyen, eg tar notater, no har de sjansen, oppfordrar ho.