Første spadetak

Dei førebuande arbeida på tomta der den nye brannstasjonen skal koma har pågått ei lita stund allereie.

- Vi har fått trekt fram straum, fiber og lignande under vegen og fått på plass brakkeriggen i førre veke, fortel brannsjef Stein Gjøsund.

Måndag fekk han hjelp av ordførar Terje Søviknes til å ta dei første symbolske taka med gravemaskina.

- Dette er ein stor dag for oss som jobbar i brannvesenet, men òg for innbyggerane i Os.

- Når vi kjem inn i nytt bygg i oktober 2012 vil vi bli i stand til å levera enda tryggare og betre tenester, smilar Gjøsund.

Kreative og løsningsorienterte

Det er kommunal teknikk som skal stå for den første delen av arbeidet med å skifte ut massane og få på plass steinmassar der brannstasjonen skal koma. Arbeidet deira skal vera ferdig til 1. oktober 2011.

- Eg må seie eg er imponert over dei tilsette på kommunal teknikk.

- I møter med konsulentane og meg er det ofte dei som har kome med dei gode ideane og løysingane i høve til arbeide dei skal gjera.

- Eg er sikker på at dei har spart kommunen for ein heil del penger med dei løysingane dei har fremma, skryt brannsjefen.

Nyttar E39

Jordmassane skal fraktast vekk frå tomta og leggast på deponi forskjellige stader i kommunen. Steinmassane har kommunen allereie liggande i deponi ved Brandneset.

- Mesteparten av trafikken med å frakta massar frå og til tomta kjem til å gå på nye vegen (E39), forklarar Gjøsund.

Slik sett vil publikum bli lite direkte berørt av transporten då den går utanom Os sentrum.