Første tap sidan 25. mai

Lysekloster spelte i dag borte mot Vestfossen. Vestfossen hadde ein svak vårsesong, men slo Brann 2, spelte uavgjort mot Fana og vann over Djerv 1919 etter sommarferien.

På heimebane vann Lysekloster 4-1, i dag leia dei 0-1 til pause.

– Vi starta også 2. omgang bra, men så fekk vi eit svart kapittel, seier ein skuffa Lysekloster-trenar Ruben Hetlevik.

Vestfossen - Lysekloster 3-2 (0-1)
Målskårarar, Lysekloster: Even Vetås og Karol Zielinski.

Lysekloster hadde 10 sigrar på rad før dei i førre runde spelte 0-0 mot serieleiar Vard Haugesund. Med siger i dag ville dei halde seg to poeng frå toppen.

– Dei klarerte eit frispark, og vi skulle senda ball til keeper. Denne blei snappa opp av ein Vestfossen-spelar, og vi lagde straffe, fortel Ruben om starten på snuoperasjonen til heimelaget.

Vestfossen kom inn i kampen, Lysekloster kom ikkje til hektene før det sto 3-1.

– Eg sette innpå det vi har av spissar, men fekk ikkje skåringa før i 87. minutt, og denne eine var ikkje nok.

Hetlevik fortviler etter tap av viktige poeng mot eit lag «vi skal slå i 10 av 10 kampar».

– Det var ein vanskeleg bane, og Vestfossen er fysiske. Men vi klarte oss bra mot endå meir fysiske Djerv 1919, og skal takla forhold som dette betre enn det vi gjorde i dag.

Gir ikkje opp mål om opprykk

Trass auka avstand til tabelltopp har Lysekloster langt frå gjeve opp målet om opprykk.

– Det vil nok blir fleire uforutsigbare resultat utover hausten. Vi får berre sørgja for å gjera jobben vår, så vi stå i posisjon om andre feilar.

Lysekloster speler neste kamp heime mot Fyllingsdalen, som dei i vår slo 0-3 på bortebane.

• Terminliste og tabell