Frå Austevoll og Aarhus

I førre veke signerte Lysekloster midtbanespelaren Joachim Bjånesøy (21). No er også danske Kaspar Hjørngaard (32) klar.

– Til no er vi oppe i fem nysigneringar i sommar, og vi er så og seia i mål. Vi jobbar med ein spiss, så det kan bli nok ei signering om kort tid, seier sportsleg leiar Svein Kollen.

På same tid har klubben mista sju spelarar, blant dei er Tommy Gaustad, Thomas Helland og keeper Chris Sunde Midtun.

Til Noreg med proff kjæraste

Kaspar Hjørngaard kjem frå Danmark til Noreg for å følgja kjærasten, Sofie Bloch Jørgensen, som har skrive proffkontrakt med Sandviken.

Sjølv kjem Kaspar frå klubben Aarhus Fremad, som speler i dansk 2. divisjon.

– Vi har fått eit godt nettverk utanfor Hordaland. Det var danskane sjølv som tok kontakt med oss, seier Kollen.

– Kaspar er ein rutinert og sterk spelar som vi no får inn som midtstoppar.

Hjørngaard er utdanna idrettspedagog og har spelt fotball på høgt nivå heile livet sitt.

Midtbanespelar med målteft

Joachim Bjånesøy frå Austevoll har hatt 2,5 ungdomsår i Brann, spelt for Norge U16 og vore noregsmeister med Brann sitt juniorlag.

Etter eit halvt år for Fana i 2015 gjekk han tilbake til Austevoll.

Der har han no spelt 61 kampar og skår 10 mål, 4 av dei i løpet av vårsesongen 2017.

– Joachim er ein teknisk god midtbanespelar som har eit potensiale vi no skal prøva å få utnytta fullt ut.

Lysekloster sin neste kamp er som kjent derby mot Os førstkomande søndag.