Frode Øye ny juniortrenar

– No har vi funne rett mann, seier Bjørn Mjelva, trenar for gutelaget til Os.

Os Turn Fotball har dei siste månadane jakta på ny trenar for juniorlaget til Os etter at Tim Henrik Sperrevik blei engasjert for A-laget før jul.

Juniorspelarane har fått trening, men først i førre veke var eigen trenar på plass.

Det var Mjelva som foreslo Øye som ny juniortrenar.

– Eg kjenner Frode frå Søfteland idrettslag, der vi har spelt på A-laget saman. Seinare har vi også vore på fleire kurs i lag.

Tidlegare Os-spelar

Frode Øye, som fyller 40 år i år, bur i Os, er gift og har tre ungar. Han vaks opp på Søfteland og har spelt fotball for blant anna A-laga til Bjarg og Os.

Seinast i fjor spelte han for Os 2, som innlånt oldboys-spelar. Frode har også spelt for juniorlaget til Os, i "gullalderen" tidleg på 90-talet, saman med spelarar som Tor Åge Thuen og Erik Monsen vann dei serien etter å ha slått både Brann og Fyllingen.

I fjor haust var han også med på å vinna den prestisjetunge gatecupen MidtsidenCup som toppskårar for laget T. Ullrich.

– Blei glad då dei spurte

Den nye trenaren er så vidt i gang med den nye deltidsjobben sin. På dagtid jobbar han som politi i Fana.

– Eg har tatt nokre kurs, blant anna Trenar 1 B-kurs, og har alltid likt å vera trenar. Frå før har eg berre trenarerfaring frå aldersbestemt nivå, seier Frode Øye til Midtsiden.

– Men eg blei glad då eg fekk tilbodet om trenarjobben for juniorlaget. Eg får blant anna med meg Terje Kvittingen som oppmann.

– Terje kjenner laget godt frå før. Og så kjenner er gutetrenar Bjørn og A-lagstrenar Tim godt frå før. Det blir kjekt og lærerikt å jobba saman med dei, seier Øye.

Os har tatt 6 juniorspelarar opp i A-stallen. I tillegg er 5-6 juniorar i u-stallen/Os 2. Under juniorlaget står ei stor og sterk gutegruppe med over 40 spelarar fordelt på tre lag.

I vekene som kjem, frå møte førstkomande onsdag og utover, skal trenarane på dei tre nivåa saman med sportsleg utval i Os Turn Fotball, legga planar for spelarbruk og spelarutvikling i 2012-sesongen.