Full kontroll i serieavslutninga

Damelaget til Os fekk ei svak oppkjøring til årets sesong og starta hausten med fem tap på rad.

Få aktive spelarar gjennom sommaren gjorde at oppkjøringa var svak, men damene fann etterkvart formen og vann fire på rad.

Også etter jul har dei tatt greit med poeng og før serieavslutninga laurdag hadde Os tatt 7 poeng på dei siste 6 kampane.

– Då var det godt å også avslutta med siger. Vi måtte klara oss utan Madeleine Hjertnes, Caroline Cook og Malin Fosen, men hadde full kontroll kampen gjennom, seier trenar Gitte Torp.

Os - Voss 24-19

– Vi leia stort sett med 4 til 6 mål. Eg trur det nærmaste dei kom var 3 mål bak, seier Gitte.

Med fleire spelarar vekke fekk også Gitte si dotter, bylag-spelar Mia Torp Nielsen (16), spelt ein del. Mia debuterte på damelaget til Os med nokre minutt mot Sotra, laurdag fekk ho spela meir då strek-spelar Caroline var vekke.

Landa på 8. plass

Alle dei siste rundane i serien blei spelt på Sotra i løpet av laurdagen.

På kvelden var det premieutdeling og bankett på Scandic i Bergen.

Voss landa på 4. plass, Os på 8. plass. med 18 poeng, 8 poeng meir enn Jotun, som rykte ned saman med NHHI.

Fyllingsdalen vann framfor Førde og Stord.

Eit godt år med seniorlaget

Jentetrenar Gitte Torp steppa inn etter at klubben på seinsommaren ikkje fann grunnlag for å halda fram med elitetrenar Jesper Svensson.

For lite oppmøte på begge seniorlaga gjorde at målsetnaden måtte justerast noko.

– Det var ein stor overgang å gå frå aldersbestemt til senior, spesielt når det gjeld det å leia kampar, synest Gitte.

– Men eg føler eg har vakse med oppgåva, det har vore eit lærerikt år. Og det har vore veldig kjekt, det er ei veldig fin gruppe.

Det er førebels uvisst om Gitte er trenar for damelaget også neste sesong.