Gjorde comeback og tok to NM-medaljar

Fleire av brytarane frå Os har nyleg vore i konkurranse (WAL) i England, og sto over årets NM, men Os Håndbakklubb stilte likevel med fem deltakarar i Oslo.

Ein av dei er Dan-Jarle Køhler Raustein, som ikkje har konkurrert sidan Os tok 26 medaljar på heimebane i Oseana i september 2011.

Den gong blei det gull i høgre og sølv i venstre på Dan-Jarle, også i helga fekk han medalje.

– Eg har sakna handbak etter at eg la opp i 2011, og då Michael Hansen nyleg byrja så fekk eg påskotet eg trengte til å byrja å trena igjen. Det har ikkje blitt så mykje trening, men nok til at eg blei med til NM.

Køhler Raustein tok i år bronse med høgre arm og sølv med venstre.

– Når du har vore vekke ei stund så er du litt treigare i starten. Eg tapte berre for noregsmeisteren (Erlend Hørte Jenssen), men dei kampane tapte eg raskt, seier Dan-Jarle og ler.

Fleire medaljar, men ein del misnøye

Dei andre fem deltakarane frå Os var debutant Michael Herbert Hansen, Per-Christian Helland Rundhovde, Lars Holen, Øystein L. Brakstad, Reidar Skofteby og Arne Thuen.

– Per-Christian tok bronse, men var ikkje nøgd med det, fortel Dan-Jarle.

Veteran og mange gongar noregsmeister Arne Thuen blei straffa hardt av dommarane og reiste heim utan medalje.

– Dommarane var veldig på hogget etter å dømma for olbogeløft, og fleire av desse såg urettvise ut for både Arne og oss som såg på.

– Kjekt å gjera comeback

Sjølv er Raustein den som var mest nøgd med Oslo-turen.

– Det er spennande å konkurrera, og gøy å bryta, men eg blir frykteleg nervøs før stemnet er i gang.

– Men elles var det berre kjekt å gjera comeback og å ta to medaljar til, seier Dan-Jarle, som frå før har fire NM-gull.

• Midtsiden samleside: Handbak