Gjorde reint bord

Årstad videregående skole stod som vertskap då kokk- og servitørlag frå skulane i Hordalend blei invitert til årets Horda-Cup. Fusa vidaregåande skule stilte med lag både i servitør og kokkeklassen.

"Jegerens bryllup"

Tema for konkurransen var "Jegerens bryllup". Kokkane hadde i oppgåve å lage ein treretters meny med forrett av sjøørret, hovudrett av reinsdyr og dessert av ostekrem. Servitørane fekk fleire teoretiske utfordringar innan vin og drikkevarelære, servering og gjestebehandling og borddekking.

Elevane frå Fusa gjorde nær reint bord då dei blei kåra til beste kokkelag og beste servitørlag. I tillegg tok dei delprisane beste forrett, beste hovudrett på kokk og beste temabord på servitør.

Dommarane for både kokk og servitør var imponerte over elevane og syntes dei heldt eit svært høgt nivå.

Vel så godt fagmiljø

- Det er ekstra gøy å vinne i år, for det er berre nokre veker sidan det såg mørkt ut for linja på skulen, fortel lærar Camilla Nesheim i ei melding til Midtsiden.

Restaurant- og matfaglinja ved Fusaskulen blei i vinter foreslått nedlagt av Fylkesrådmannen, men i mars vedtok Fylkestinget å behalda linja.

- Hovudargumentet for nedlegging var lite fagmiljø, fortel Nesheim.

Fem av dei seks elevane har i skuleåret vore utplassert i forskjellige lokale bedriftar som Solstrand Hotell og Bad, Smak Catering og Kafè OleB.

- Store skular har eit stort fagmiljø, men dette syner at sjølv ein liten skule med godt samarbeid med dei lokale bedriftene har eit vel så godt fagmiljø, avsluttar ei tydeleg stolt Nesheim.