God gjennomkjøring mot Fusa
Mats Lepsøe skåra i comebacket: Ungdomane på Os 2 leika seg til siger over Fusa i treningskamp i går. I morgon speler A-laget mot Nest-Sotra.
– I sånne treningskampar kan vi velja mellom to ting, halda oss på motstandarane sitt nivå og kriga, noko som er tungt, eller la ballen gå i laget og kjøra eit tempo motstandarane ikkje klarar å følgja.
– Vi klarte å kjøra tempo, Fusa hang ikkje med og vi skapte mykje. Vi burde ha skåra 8-10 mål i går, seier trenar Tim Henrik Sperrevik om torsdagens treningskamp for Os 2.
Osingane bomma blant anna på to straffar. Fusa sitt mål kom etter ein glipp på eit tilbakespel til keeper. Frode Øvredal redda, men returen gjekk inn til 2-1 før pause.
Os 2 - Fusa 5-1 (2-1)
Mål, Os: Ramo Racic 2, Mats Lepsøe, Egil Thuen og Tor Erik Kjosås Berge
Fusa hadde eigentleg rykt ned til 6. divisjon etter 2011-sesongen, men grunna måten andre lag flytta seg i divisjonssystemet på fekk dei tilbod om å halda plassen i 5. divisjon. Os 2 rykte ned frå 4. divisjon i fjor og speler i same avdeling som både Fusa og Søre Neset i år.
Comeback og skåring
Mats Lepsøe fekk berre med seg to-tre serierundar med Os i fjor før han i ein kamp med andrelaget skadde kneet sitt. Korsbandet rauk og Lepsøe, spelaren som "kjem ut av dei utrulegaste situasjonar med ballen i beina", måtte operera og halda seg vekke frå banen ut sesongen.
– Det har tatt si tid å koma tilbake, det er berre rundt tre veker sidan eg byrja å trena utandørs med ball igjen, fortel Mats.
Han var på banen frå start i gårsdagens kamp og auka frå Ramo sitt 1-0 til 2-0 før pause.
– Eg kjente naturlegvis at eg har vore vekke ei stud, men det var veldig kjekt å spela kamp igjen og det gjekk fint med kneet.
Ungt lag
Os starta kampen med sju juniorar. Sisteårsjunior Håvard Grøteide hadde med seg førsteårsjunior Fredrik Heggland i midtforsvaret.
Også keeper Frode Øvredal, høgreback Ørjan Glesnes og høgrekant Egil Thuen var gutespalar i fjor.
På djup midtbane sto andreårsjuniorane Simen Lassen og Håkon Kvittingen.
Os 2 frå start: Frode Moberg Øvredal - Ørjan Glesnes (hb), Fredrik Heggland, Håvard Grøteide, Tor Erik Kjosås Berge (vb) - Håkon Kvittingen, Simen Lassen - Egil Thuen (hk), Mats Lepsøe (vk) - Mounir - Ramo Racic.
Andre med speletid: Even Olsen, Thomas Mjelva, Glenn Krossøy, Steffen Ludvigsen og John Ole Johannessen.
Mot Nest-Sotra laurdag
Denne helga kjører Os ny treningsverkstad der andre økt laurdag er treningskamp mot Nest-Sotra.
Os slo Bergen Nord 5-0 og tapte 1-2 for Fana i Vestlandshallen. I morgon ventar dei tøff motstand igjen i 2. divisjonsklubben frå Sotra.
– Vi held frammed fokus på det defensive arbeidet vårt. Eg var nøgd med det vi fekk til mot sterke Fana og håper å sjå at ting fungerer minst like bra på Kuventræ i morgon, seier Tim.
Kampen startar klokka 15.