God medaljehaust før NM i Oshallen

Laurdag 28. november kjem noregseliten i karate, uansett stilart, til Os.

– Vi arrangerer NM i lagkamp. Det er første gong vi arrangerer NM, fortel hovudinstruktør Cato Bruarøy.

Lagkamp er ikkje «gjengslagsmål», men kamp éin mot éin, der det laget med flest sigrar vinn.

– Det er tre deltakarar pluss eventuelt to reservar per lag. I praksis kan du stilla med to utøvarar, om begge vinn sine kampar vinn laget 2-1 og går vidare, forklarer han.

Påmeldingsfristen er ikkje gått ut og det er førebels uvisst både kor mange deltakarar og kor mange lag arrangørklubben stiller med.

– Vi kjem nok med lag i både kadett og senior, får vi alle våre beste med så kan det bli medaljar. Uansett gler vi oss veldig til å visa osingane konkurransekarate på heimebane.

Mange ungar og mange jenter

Os Karateklubb opplever veldig god rekruttering for tida, frå dei yngste frå 4 år (!) og opp som trener «foreldre- og barn-karate» i gymsalen i Øyane, til dei frå 8 til 12 år og oppover i kadett og junior.

– Ungane kan delta i konkurransar frå dei er 8 år. Fram til dei er 11 år er det utan plassering, alle får to kampar og lov til å gå to kata (mønster av teknikkar, éin og éin framfor ein jury som deler ut stilkarakter).

I helga var fleire av dei yngre konkurranseutøvarane i vestlandscup i Laksvåghallen. Mange av dei som er gamle nok til å ta medalje gjorde nettopp det.

– Det er spesielt kjekt å sjå at det er så mange jenter. Om flesteparten av desse held fram med karate så kjem vi til å få det beste jentelaget nokosinne, for dei er veldig flinke og glade i å trena.

Sondre Kvamsdal slo alle

Mens dei på 8, 9 og 10 år fekk deltakarmedalje kjempa dei som har fylt 11 år eller meir om gull, sølv og bronse.

Tuva Bagen fekk bronse, Even Hatlestad fekk sølv og bronse og Melina Solvang fekk sølv i både kamp og kata.

– Så kom Sondre Kvamsdal, som deltok i den store klassen 13-14 år, og vann alle kampane sine. Han er så god at eg fekk lyst å senda han rett til NM, seier Cato.

Armin Palislamovic, som snart fyller 16 år, har vunne NM fleire gongar. I vestlandscupen vann han også greit.

Benjamin Askvik Midtbø vann dei to første kampane sine 6-0, men rauk ut i tredje runde og fekk akkurat ikkje medalje. Tobias Hagen Røttingen deltok òg i 12-13 år, og gjekk godt, men blei straffa for å ha litt for hard kontakt. Også Eirinn Voldsund og Henrik Heiberg Andersen deltok i ungdomsklassen.

Midtsiden samleside: Kampsport