God trøyst i flink ungdom

Os spelte borte mot Stord onsdag kveld og gjekk på eit surt 27-22-tap.

– Bortekampar i vekedagene er ikkje det ideelle med tanke på reise og førebuing, og onsdag klarte vi ikkje å få opp dampen, seier Erlend Lyssand.

Stord - Os 27-22 (12-10)

– Stord er eit lag vi skal slå så dette blei ein skuffande tur for vår del, fortel trenaren.

Anna på landslaget igjen

Men Lyssand og resten av handballmiljøet i Os har fleire ting å gle seg over, og å sjå fram til denne veka.

I går blei uttaket til landslagssamling for J16-17 lagt ut på handball.no, og stortalentet Anna Bjørke Kallestad frå Os er blant dei 24 jentene som er tatt ut.

– Dette var veldig kjekt. Anna har prestert veldig bra på seniornivå i haust og vi gler oss veldig over at ho no er tatt ut på aldersbestemt landslag igjen, seier Lyssand.

Samlinga er i Skien 29. november til 3. desember og blir leia av Bendik Berg og Jeanette Nilsen.

Første Bring-runde

Anna er del av det sterke J16-laget til Os som også denne sesongen kvalifiserte seg til å spela Bring-serie.

Serien er mellom dei beste laga i Noreg på aldersbestemt nivå og første av fem seriehelger går i Drammen denne helga.

Førre sesong enda Os cirka midt på Bring-tabellen, i helga blir dei tre første kampane i Bring-serien spelt.