Abonnentar innanfor det lilla området må framleis koka vatnet, sjølv om gårsdagens prøve viser at vatnet er reint. (Kart: Os kommune)

Gode resultat av ny vassprøve

Regelverket seier likevel at kokevarselet blir ståande i nok eit døgn.

Av: Kjetil Vasby Bruarøy

I går sendte Os kommune ut kokevarsel via sms til 888 abonnentar, inkludert skular og barnehagar, grunna indikasjon på forurening etter rutinemessig vassprøve i eit høgdebasseng på Bjørnen (ein tank, ikkje Bjørnavatnet).

Førre prøve, som var fin, blei tatt for ei veke sidan.

– Vi har i dag fått svar på ny prøve, tatt i går, og denne var heilt fin. Det er ikkje mistanke om at vatnet er eller har vore forureina, seier einingsleiar Agnete Haugland frå Os kommune.

– Men kva var det med prøven i går som førte til kokevarsel?

– Kva som gjorde at vi fekk denne indikasjonen vil eg ikkje spekulera i. 

Kokevarselet blir likevel ståande i minst eitt døgn til.

– Ifølgje regelverket seier at vi må ha positivt svar på nok ein vassprøve, og at det skal vera minst 24 timar mellom desse. Vi tar ny prøve i dag, og er det positivt svar på denne i morgon, så er det slutt på kokevarselet.

– Vi beklager ulempene som følgjer med eit kokevarsel, men håper samstundes på forståing for at dette er rutinar vi må følgja for å sikra reint og trygt drikkevatn i kommunen vår, skriv Os kommune på heimesidene sine.

Fekk ikkje svar på «sjukmelding»

Midtsiden har vore i dialog med ei kvinne som bur i Halhjemsmarka, og som i går spurde på Facebook om det var nokon som hadde opplevd å bli dårleg av vatnet.

– Eg og sambuaren min drakk av vatnet rett før varselet kom, og han blei gradvis ganske sjuk i går.

– Men det kan naturlegvis vera omgangssjuke, og eg fekk heller ingen svar på meldinga eg la ut.

 

Fleire saker