Handplukka dansk

Torsdag opnar den nye butikken Olivia på Amfisenteret, med hovudfokus på mote for frodige damer, men også med eit spennande utval merker som er nye for dei fleste vestlendingane.

Kjetil Vasby Bruarøytirsdag 11. aug. 2009 06:29

− Det blir handplukka Zizzi-utval saman med andre gode eksempel på dansk design, og storleikar frå 36 til 56, seier Leslie Fjelltveit og Kirsten Fimreite.

Breidde for vaksne
Dei siktar seg inn på målgruppa frå rundt 25 år og opp i alder, eigarane av butikken som opnar i andre etasje i AMFI Os torsdag 13. august.

− Det ligg litt i namnet, som ikkje berre har med storleik å gjera, Olivia er for vaksne, seier Kirsten.

− Det blir eit blanda konsept, der den eine delen av butikken har Zizzi-klede, kjent for sine storleikar frå 42 til 56 – og den andre med merker frå same danske eigar, men med storleikar frå 36, legg ho til.

Flest kvardagar
Blant dei andre merka, som berre er for sal i få andre butikkar i fylket, er Pulz og Culture, også dei frå Zizzi-eigar Ball Group. Pulz og Culture lagar ifølgje Leslie kvalitetsklede med god passform til OK pris.

− Zizzi er kjent for dei fleste og sakna av mange, etter Zizzi-butikken som var i senteret la ned. Folk kjem nok til å merka at vi har eit anna utval enn Zizzi, med meir for kvardagar. Det er dei vi har flest av, seier Leslie, som frå før har Zizzi-butikk i Bergen Storsenter.

− Eg trur også at damer som brukar mindre storleikar kjem til å ha sans for Pulz og Culture, då desse har ein del frå den populære søstera Zizzi i seg. Klede frå Mac og støvlar frå Ilse Jacobsen blir også viktige varegrupper.

Per og Per
Både Kirsten og Leslie har ein del fartstid på AMFI Os. Kirsten og mannen Per Ove eig Eurosko og Økonomisko, Leslie eigde SoHo, som heldt til i same lokale Olivia no opnar i.

− Eg har ein SoHo på Laksevåg, som eg opna i år, og som går fint. Men vi hadde dessverre ikkje godt nok sal på Os til at eg ville driva vidare, fortel Leslie.

Då ho og mannen Per Gunnar hadde ei sosial stund med Kirsten og mannen Per Ove, blei det fleipa med at Leslie og Per Ove eig kvar sine to butikkar, medan Leslie sin mann og Per Ove si kone ikkje hadde nokon butikk – på papiret.

− Så då blei det slik at eg og Leslie sin mann, Per Gunnar, står som eigarar av Olivia. Men namnet på selskapet er Per og Per AS, fortel Kirsten.

Den viktige servicen
Verken Leslie eller Kirsten skal jobba i butikken. Kirsten ser likevel fram til å supplera sko-kunnskapen med lærdom om damemote.

− Leslie kan mykje, eg følgjer med for å læra. No ser eg fram til motemessene!
Same dag som vi intervjua dei to, blei dagleg leiar tilsett. Tove Nybø Johansen, som har jobba hos Eurosko på senteret i fleire år, skal styra den nye butikken.

− Å selja klede handlar om så mykje meir enn å stå i kassen, kundane kjem for å finna noko som passar, triveleg betjening og god hjelp betyr mykje. Tove er ei munter dame som vi trur folk kjem til å lika å prøva klede hos, no held vi på å finna tre like godt eigna damer til å hjelpa ho i butikken, sa Leslie to veker før opning.