– Håper å kunne inspirera

Villmarksbarna er ein barne-TV serie på 8 program som har premiere på NRK Super i kveld.

– Vi håpar det kan vera ein serie som ikkje berre fengjer ungane, men òg at dei vaksne kan la seg inspirera til å ta med barna ut på tur.

I serien følgjer vi Inger, mannen Lars og borna Narve (4 og eitt halvt år), Runa (8), Ida (10) og Guro (14) på turar gjennom to år.

– Serien er stort sett filma i Troms og Finnmark.

– Vi har vore på fisketur i fjellet, som kveldens episode handlar om. Vi har vore å sett etter bjørn i Pasvikdalen opp mot russergrensa og vi har vore ute ved kysten.

– Til og med ein tur til Svalbard skal sjåarane få vera med på, fortel Inger Wallem Anundsen.

Lyst og inspirasjon

Mange kan nok tykkje det er vanskeleg å koma seg ut av godstolen og ut i naturen.

– Det handlar mykje om lyst og inspirasjon.

– Om vi vaksne er entusiastiske så blir ungane det òg.

– Eg tykkjer ofte det er enklare ute i naturen enn heime i stova, kor ein ikkje har forstyrrande element som TV, data og telefon, seier Inger.

Treng ikkje vera langtur

Sjølv om Inger og mannen Lars Krempig er over gjennomsnittet glad i, og opptekne av, naturen, fortel Inger at det ikkje er så mykje som skal til.

– De som har haustferie no, må berre komma dykk ut. Det treng ikkje vera så lange turen.

– Start i det små. Ein båltur bak huset kan vera like fin som ein heildagstur på fjellet.

– Du vil bli overraska over kor mykje ungane orkar, berre de kjem dykk ut, reklamerar villmarksmammaen.

Spent på mottakinga

Det heile starta med at Inger og Lars laga ein serie for lokal-TV-stasjonen TVNord.

– Det var meir eit familieprogram, enn barne-TV.

– Serien blei godt motteken og vi fekk spørsmål om ikkje vi ville freiste å laga noko nasjonalt.

– Med støtte frå produksjonsselskap, Innovasjon Noreg, fylket og lokale støttespelarar har serien blitt til.

– Eg må innrømma eg er spent på mottakinga. Vi har jo lagt ein personleg innsats i det heile, avsluttar Inger Wallem Anundsen som saman med mannen har stått for all filminga i serien.