- Har du ein brukt mobil til overs?

Lyseklosterjentene er eitt av 500 lag i Noreg som har fått bli med i den nasjonale innsamlinga av brukte mobiltelefonar arrangert av Telenor og Noregs Idrettsforbund.

For kvar telefon jentene klarer å samle inn får dei 35 kroner i pant.

- Vi håper vi klarer å samle inn minst 30 telefonar kvar, fortel Susann Heggland.

Flaskar og mobil

Jentelaget har i 5-6 år samla inn tomflasker frå lysefjordingane. Laurdag førstkommande tek dei òg i mot brukte mobiltelefonar.

- Vi pleier samle inn tomgodt to gonger i året.

- Då reiser vi rundt i heile Lysefjorden og delar av Nordvik med ein sjåfør og to spelarar i kvar bil og samlar inn flaskar som vi leverar videre til butikken på Buena for å få pant på.

Responsen på flaskeinnsamlinga har heile vegen vore bra.

- No er det faktisk slik at folk lurar på om det ikkje snart er ny innsamling, fortel jentene.

Sikker sletting

Om folk er bortreist når jentene kjem, så sett dei gjerne flaskeposen på trappa.

- Det kan dei gjerne gjera med mobiltelefonane òg, så skal vi sørga for at den blir sendt Telenor for sikker destruering, seier jentene.

Husk berre å ta ut SIM-kortet før du gir frå deg telefonen. Minnekort og anna som ligg lagra på telefonen vil bli forskriftsmessig sletta av Telenor.

Satsar på ny suksess

Inntekten jentene får frå flaske- og mobilinnsamlinga skal dei bruke til å reise på Norway Cup. Jentelaget til Lysekloster blei i fjor historiske då dei som første lag frå klubben tok seg til A-sluttspelet i turneringa.

- Vi har eit mål om å klare A-sluttspel også i år, så får vi sjå kor langt vi kan koma, smiler jentene som håpar folk leiter i skuffer og skap etter kasserte mobiltelefonar dei kan få på laurdag.

Også Nore Neset IL er blant dei 500 idrettslaga i Noreg som deltek i den nasjonale innsamlingsaksjonen av brukte mobiltelefonar.