Har du høyrd om nattmarknadsdagane?
Jeanett testa ut eit Osfest-stunt, og hadde stor omsetnad frå liten butikk.
Kjetil Vasby Bruarøy
– Nei, eg er ikkje kasta på gata, seier Jeanett Borgen Kallekleiv og ler.
Innan august 2019 må ho få nytt lokale til butikken sin, då lokalet ho leiger er selt, men dette er ikkje årsaka til at ho sto på Osøyro og selte klede til over midnatt under Osfest.
– Vi har selt mykje denne veka inn mot Osfest, ikkje minst regnklede, sidan det var meldt nedbør. Eg vurderte tidleg i veka å stilla ut for å selja regnklede til forbipasserande utover kvelden, og bestemte meg kort tid i forvegen.
Kompakt suksess
Då ho stengte klokka 19 la ho eit assortert utval klede i arbeidsbilen til pappa Arne og køyrde 100 meter bort til Dragesethjørnet i Torggata for å driva butikk vidare.
– Regnklede slo jo ikkje særleg an, sidan vêret blei bra, men eg har selt overraskande mykje av andre ting, ikkje minst skjerf og gensarar.
– Kva er «overraskande mykje»? Tilsvarar det ein god tysdag?
– Nei, mange gongar betre enn ein god tysdag. Dagen i dag har vore ein god fredag, og eg har selt like mykje av redusert utval på dette plastbordet som eg har gjort i løpet av ein heil dag i butikken.
– Så no blir det nattmarknad laurdag òg?
– Nei, laudag skal eg på fest. Men dette er noko å tenkja på for fleire, litt liv i gatene på veg til og frå festival skadar ikkje.