Har du mat du kan selja?

Bondens marked Norge si avdeling i Bergen vil, saman med Os Bondelag, halda informasjonsmøte for lokale matprodusentar.

– Vi har blitt utfordra av Bondens marked å samla potensielle utstillarar. Så vidt eg kjenner til er det få eller ingen utstillarar frå Os på dei månadlege marknadane i Bergen, seier Olav Botnevik frå Os Bondelag.

Bondelaget i Os har nyleg arrangert Bondens Dag og feira sitt eige 150-årsjubileum. Samtidig har Bjørnafjorden Matkultur samla 220 gjestar til 21 kortreiste rettar på ein suksessrik middag i Oseana.

Med dette som bakteppe trur Olav at det kan vera fleire småskalaprodusentar i Os som kan reisa til by'n og tena pengar.

Frå fisk til rips

Ostar, honning, økologisk kjøt, vilt, fisk og grnsaker er blant det du normalt kan kjøpa på Bondens marked i Bergen.

– Leiar for Bondens marked kjem for å orientera, og for å svara på eventuelle spørsmål. Å selja direkte til forbrukar kan vera både lønsamt, hyggeleg og lærerikt.

– Anten du har eit lite drivhus, nokre bier eller bærbuskar, kan det vera verdt å koma og høyra på, seier Olav.

Han er sjølv vertsskap for møtet, som finn stad i selskapslokalet Mathiaskjellaren på garden hans førstekomande tysdag.

Ifølgje bondensmarked.no er det marknad i Bergen fem laurdagar før jul.