Har funne ny stoppestad i Os-skjergarden

Laurdag om ei knapp veke er det tid for Bergen Poker Run igjen.

Etter å ha køyrd nord for Bergen i 2020 gjekk turen igjen sør og til Os-skjergarden i 2021 - då også frå pitstop på Vedholmen Landhandel via Hauglandsosen og heilt inn til Os sentrum for første gong.

I 2022 var ruta, som ofte elles, berre innom éin stad i Os, Vedholmen - men i år blir det to stopp i Os med trekk av kort til kveldens pokerhand.

I år skal konvoien nemleg, for første gong, vidare frå Lysefjorden forbi Lysøya og inn i Seiasundet.

Av kartet går det fram at turen går rundt Lysøya, men uvisst kva retning i forhold til klokka, og ifølgje programmet blir det også eit stopp så publikum på land får sjå nærmare på fartsfantoma.

På Kafé Ole B får båtførarane sitt første kort for dagen.

Så kjem kort nummer to på Bunnpris Vedholmen Landhandel før turen går til lunsj på Olaskjeret utanfor Bakkasund i Austevoll.

Fjerde kort blir delt ut nær Askøybrua før konvoien seglar inn Byfjorden til Zachen, der dei får femte kort, middag, pokerspel og underhaldning.