Hassan til Brann?

Ifølgje BT skal Hassan El Fakiri vera på veg bort frå Os og tilbake til Brann. El Fakiri er ifølgje avisa tenkt som erstattar for Carl-Erik Torp som blei takka av i Brann i pausen av kampen mot Rosenborg søndag.

BT skriv at dei veit at Hassan El Fakiri blir Torp sin erstattar.

– Det er ein profil som ligner Carl-Erik Torp. Som «Calle» har den nye trenaren spelarerfaring, seier utviklingssjef Magni Fannberg i Brann til avisa. Fannberg seier vidare at han truleg ikkje kan stadfesta namnet før i november.

Ikkje avgjort

Midtsiden snakka med sportsleg leiar i Os Turn, Jan Frode Skeie, tidlegare tysdag.

– Vi skal ha eit møte om framtida og kva som skjer vidare denne veka, sa Skeie.

Hassan El Fakiri har kontrakt med Os Turn ut 2017. Han har 196 A-lagskampar for Brann og var eindel av laget som blei seriemeister for 10 år sidan. El Fakiri kom til Os foran 2015-sesongen, då etter ein sesong som spelande assistenttrenar for Rikard Norling i bergensklubben.