Historiske crosskøyrarar

Aldri tidlegare har det skjedd at tre vestlendingar ligg an til å tapetsera pallen i MX 2 Ungdom (14-18 år), før den siste av tre NM-runder går av stabelen i Tønsberg til helga.

William Havsgård ligg etter to runder på 1. plass, tre poeng framfor Magne Klingsheim frå Elgane på Jæren. Marco Matre følgjer hakk i hæl, berre eitt poeng bak Klingsheim igjen. Dei tre har opparbeidd seg ei luke ned til fjerde plassen.

– Mykje kan skje, vi kan få trøbbel med sykkelen, velta eller køyra eit dårleg løp, men det har nok aldri tidlegare skjedd at tre utøvarar frå Vestlandet ligg på dei tre første plassane før siste runde, smiler dei to då Midtsiden møter dei på banen i Kolskogen.

Tøff konkurranse

Dei to osingane ventar tøff konkurranse frå Magne Klingsheim i den siste NM-runden.

– Magne satsar for fullt på motocrossen og køyrer mellomanna EM.

– Han blir ein tøff konkurrent, men vi får berre gje full gass og satse på at det held heilt inn, seier William Havsgård.

NM-runde blir køyrd over to heat, kor vinnaren i kvart heat får 25 poeng, 2. plassen 22 poeng, 3. plassen 20. Deretter får dei neste plasseringane frå 18 poeng og nedover.

To frå Os, ein prestasjon

Heimebanen til dei to motocross-talenta i Kolskogen, på berre 350 meter, er ikkje av dei største i Noreg, for å seie det forsiktig. Og nettopp det gjer at det dei to 18-åringane er i ferd med å få til er ein stor prestasjon.

– Det er ikkje dei beste tilhøva for motocross på vestlandet, med relativt få banar og lange avstandar.

– Difor er det jo litt tøft at vi er tre vestlendingar som no kjempar om tittelen.

– At to av oss kjem frå Os, er litt rart å tenkje på når vi ser kva vi har hatt å trene på då vi starta med motocross.

– Men samstundes så er det eit enormt godt miljø og stor interesse i klubben, så sjølv om vi har den minste banen, så er vi av dei større klubbane, fortel dei to.

Fire banar innan ein time

Nettopp treningstilhøva var noko av grunnen til at William og Marco valde å flytta til Bærum og Noregs Toppidrettsgymnas (NTG) då dei for to år sidan skulle byrja på den vidaregåande utdanninga.

– Det er litt andre tilhøve der borte. Innan ein times køyring har vi i allefall fire fulle banar å trene på, fortel dei, før dei forklarar at ei full bane er på omlag 1500 meter.

Skil lag

Etter to år saman på NTG skil dei to motocross-talenta no lag i skulekvardagen.

– Eg hadde jo aldri tenkt å ta gymnaset, men måtte jo freista når sjansen bau seg til å satsa på idretten, men no vil eg prioritera utdanninga eg har lyst på og byrjer difor på TIP (teknisk industriell produksjon) på Os vidaregåande frå hausten, fortel Marco.

William, derimot, held fram på NTG, som einaste tredjeklassingen med Motocross som idrettsgrein.

Lærerikt med gode treningar

Tida saman på NTG har gitt mykje.

– Det har vore utruleg lærerikt. Det å kunne trena i skuletida under kyndig instruksjon har berre vore positivt.

– I tillegg har det jo vore mykje positiv lærdom med å skulle bu aleine, vekke frå mor og far.

Sjølv om Marco no flyttar heimover, så kjem dei to til å trena saman også i vinter.

– Eg har fått lovnad frå læraren vår der borte at eg skal få vera med når NTG reiser på vintertrening i utlandet. Det ser eg fram til, fortel Marco.

Kjempar òg blant dei vaksne

I tillegg til å køyre ungdomsklassa, kjører dei to i MX 2, kor køyrarar uansett alder konkurrerar mot kvarandre. Syklane dei køyrer i båe klassane er 250 kubikk.

– Eg trur eg ligg på fjerde plass i MX 2, men er ikkje heilt sikker, smiler William.

– Uansett, det er ungdomsklassa som er fokus dette året. Det er tross alt den siste gongen vi kan delta i den.

William hugsar rett. Han ligg på 4. plass, med Marco to plassar bak. Spranget opp til pallen synest noko langt då Lasse Fæster Johannessen på tredje plass har heile 19 poeng å gå på. Konkurrenten Magne Klingsheim har vore suveren i denne klassa med fire sigrar av fire moglege.