I karantene mot Voss

Os må klara seg utan toppskåraren når dei møter Voss i sesongens første heimekamp på ein laurdag. - Eg håpar eg får mykje selskap på tribunen, for dette blei ein spennande kamp, seier Tim.

Kjetil Vasby Bruarøytorsdag 18. juni 2009 11:00

Laurdag møter Os Voss på heimebane, i årets første laurdagskamp på Kuventræ, og vårsesongens siste heimekamp.

- Endeleg ein laurdagskamp. No har vi fått ei god treningsveke utan midtvekekamp verken for A-laget eller Os 2. Eg håpar også at Os får spela for eit stort og livleg publikum seier trenar Frank Hellevik.

Han fortel om ei god treningsveke, også med morosame innslag.

- Vi hadde fotballgolf som del av treninga på måndag, og i går hadde vi ein komisk vri. Vi hadde intern treningskamp der ein frå motstandarane sitt lag fekk setja opp laget. Tim blei back og Tony og Vegard var blant spissane, ler Hellevik.

Utan Tim
Med to skåringar i førre kamp er Tim Henrik Sperrevik oppe i sju mål på Os sine ni kampar. Tim har spelt i åtte av dei. I tillegg har han fleire målgjevande pasningar enn skåringar til no.

- Formen er bra den, men så er det også lettare i 3. divisjon enn i 2. divisjon, seier Tim, på jobb med å bygga naust i Mobergvikjo.

- Men eg merkar at eg blir eldre, kampane sit lenger og lenger i beina, legg 33-åringen til.

Neste kamp går mot Voss, som ligg på 3. plass på tabellen, laurdag klokka 15. Den kampen får Tim kvila beina sine, i karantene etter tre gule kort.

Lagoppsett ikkje bestemt
Utanom Tim er midtstoppar Einar Algrøy framleis skadd i kneet, midtbanespelar Tore valvik har vore vekke frå nokre treningar og Christer Olsen har vore sjuk.

- Eg har nesten heile laget klart, men må sjå nærmare på formen til eit par av spelarane. Enkelte kan koma til å få prøva seg på nye plassar, seier trenaren.

Det han er mest usikker på er kven som skal ta Algrøy sin plass.

- Tony Skarvatun har gjort ein god jobb i midtforsvaret desse to kampane utan Algrøy, så han er sikker. Kven som får den andre plassen er ikkje bestemt.

Hellevik seier Ramo Racic førebels ligg best an til å ta Tim sin plass på topp, men at også Torkel Hjertnes og Tore Valvik kan bli aktuell.

- Ramo har vist mange gongar kva han kan, og han har vore solid på trening denne veka.

Vil legga Voss bak seg
Både Hellevik og Sperrevik seier dei reknar med at kampen mot Voss blir noko anna enn dei kampane Os har spelt i det siste.

- Vi kjempa mot mange som har lagt seg bakpå denne sesongen, og ikkje alltid vist oss på vårt beste. Voss kjem kanskje også til å ligga lågt i starten, men her blir det nok ein jamnare og meir underhaldande og god fotballkamp, trur Tim.

- Voss imponerte då dei gjekk frå 1-3 til 3-3 borte mot Tertnes, og harprestert noko jamnare enn Os i dei siste kampane. Men eg meiner vi har eit mykje større topp-potensiale, når vi er i slag skal vi vera ein god del betre enn Voss, seier Frank.

- I dei andre kampane har det vore venta at vi skal vinna, mot Voss er det meir ope. Det gjev gutane ei meir naturleg tenning. Laurdag har vi også høve til å fjerna Voss frå tetsbilde, det bør også vera inspirerande for spelarane, meiner Os-trenaren.

SJÅ TABELL