Kultur | 14. aug. 2018

I studio med Steven Van Zandt

«Holy fuck» sa Sopranos-stjerna, og ba om endå ein dag i studio med HM Johnsen og bandet.

HM Johnsen (innfelt) med band var i studio med Little Steven i Notodden helga før Osfest. (Foto: Privat/Kjetil Vasby Bruarøy)
Kjetil Vasby Bruarøy
Kjetil Vasby Bruarøytirsdag 14. aug. 2018 21:20

Bildeserie:

Stort publikum. (Foto: Aigars Lapsa)
Bandet i studio. Van Zandt til venstre. (Privat foto)
På scenen i Notodden. (Privat foto)
Stort publikum. (Foto: Aigars Lapsa)
Bandet i studio. Van Zandt til venstre. (Privat foto)
1 av 3
Bandet i studio. Van Zandt til venstre. (Privat foto)
På scenen i Notodden. (Privat foto)
Stort publikum. (Foto: Aigars Lapsa)

HM Johnsen med band spelte også i år under Notodden Bluesfestival, der Hans-Marius Johnsen med band i fjor vann ein prestisjetung «cup» med tilhøyrande spelejobbar som del av merksemda.

Ved sidan av å spela på opninga, for 4000-6000 menneske, deltok HM Johnsen med band på Steven Van Zandt's Blues School frå søndag til torsdag.

– Han har blitt glad i Noreg og Notodden etter Lilyhammer-perioden, og var sjølv innom blues-skulen dei siste dagane. Den siste dagen hadde vi i oppgåve å laga ein låt på éin dag. Vi var heldige og fekk tid i studio med Van Zandt, og det var ei veldig god oppleving, fortel Hans-Marius.

Van Zandt spelte i Bruce Springsteen sitt E-street band frå 1975 til 1984, er soloartist under namnet Little Steven og er elles kjent som mafiatorpedoen Silvio i TV-serien Sopranos.

Fekk ros og gode råd

– Vi fekk fin respons på låten vi hadde laga. Først var han mållaus, så sa han «holy fuck!». Han sa han likte musikken, og fekk manageren til å rydda timeplanen sin så vi skulle få nok ein dag i studio med han to dagar seinare.

Johnsen synest Van Zandt var veldig engasjert og kom med fine innspel. Sjølv om dag nummer to i studio blei amputert, sjølve studio var nemleg booka av andre, så fekk bandet frå Os litt ekstra tid med den internasjonale stjerna.

– Han sto òg backstage på den eine konserten vår. I studio hadde vi tatt ein roleg låt, men her var det bluesrock i bra tempo. «This was something else!», sa han då. Han trudde visst at vi var eit jazzband etter økta i studio.

Gode konsertar i Tyskland

Som del av premien etter cupsigeren i Notodden i fjor var konsertar i Tyskland, som blei spelte i vår.

– Den eine dagen spelte vi for 1500, ein annan kveld for eit smikkfullt klubblokale. Det beste var måten publikum oppførte seg på. Dei var veldig utadvendte før konsert, stilte mange spørsmål og kjøpte mykje merch (varer med bandlogo på, frå tskjorter til koppar).

HM Johnsen band består av Hans-Marius Johnsen (vokal og gitar), Jone Finne Kuven (bass) og Sigurd Steinkopf (trommer).

Også heime i Noreg har det blitt ein del spelejobbar. I sommar har dei blant anna spelt på Nidaros Bluesfestival, på Skånevik Bluesfestival og på Klubbøya under Øyafestivalen. I august og september ventar Horten Bluesklubb og Stavanger Bluesklubb.

– Han gjer jobben

I mars 2017 sleppte han debutalbumet sitt i Oseana (sjå video).

Rockeveteran og trommespelar Kjetil Osablod Grønvigh var i fire år bandkamerat med, og mentor for, den unge gitaristen som i 2012 fekk stipend og i 2014 også byrja å synga.

– Det er kjekt å sjå måten dei no jobbar seg opp på, med tolmod og arbeidslyst. Han har fått seg eit solid band, dei sel merch og dei tar mange spelejobbar.

– I starten må du rekna med at nokre av festivaljobbane kjem utanom beste sendetid, at ikkje du får det største publikummet, men då er det berre til å sjå på det som ei ekstra feit øving.

– Elles gjeld det å nyta det. Og å passa på å eta og sova godt, så ikkje konsertlivet blir for hardt i lengda, er gamle-mentoren sitt råd.

HM Johnsen sin siste konsert i Noreg i år, før USA-tur, blir i heimbygda, i Oseana 1. desember.

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.