Inviterer til #ideLARM!

Os Næringsråd og Bjørnafjorden Gründerpark inviterer nemleg til #ideLARM! kor du kan møta og få snakka gjennom idéen din med andre i same situasjon, men også med dei som har kome lengre og som har realisert sin idé.

– På #ideLARM! møtes gründarar i startfasen for å snakke om ideen sin, spele ball med andre i samme situasjon og få råd og innspel frå erfarne folk som har vore i same situasjon – ein eller fleire gonger. Ingen ide er for liten, for dum, for enkel eller noko som helst – alt går an, seier Fredrik Schmidt Fotland, styreleiar i Os Næringsråd.

Fortener å bli foredla

#ideLARM! går over to torsdagskveldar, kvar på tre timer.

– Mange går med ein idé dei har lyst til å realisera. Nokon har kanskje berre tenkt tanken, andre har gjerne skribla litt ned på ein serviett, medan andre igjen har gjort meir og gjerne byrja på ein forretningsplan.

– Uansett kor ein er i prosessen, så fortener idéen å bli foredra litt. #IdeLARM! er tenkt som ei førstehjelp til førstegangsgründarar, slik at dei som har ein idé på eit veldig tidleg stadium kan komma seg vidare.

– Det blir ikkje eit teknisk kurs kor ein skal læra å laga forretningsplan og liknande, meir eit gruppearbeid kor ein kan få lufta ideen sin og få gode innspel. Vi skal i allefall ikkje drepa ideeane.

– Det einaste som krevst av deltakarane er at dei veit nok om ideen sin til at dei kan presentere den for dei andre, forklarar Schmidt Fotland.

Kan læra av andre

Samlinga går over to kveldar med ei vekes mellomrom for at ideen, og innspela, skal få modnast.

– Alle ideer har best å bli sove litt på. Vi trur det er lettare å komma tilbake med ein styrka idé etter ei veke.

– I tillegg til å diskutera ideen sin, skal dei som melder seg på få møta andre gründarar som har kome lengre og få høyre korleis dei har jobba frå idé til realisering. Vi har med både eit par råferske gründarar og nokre som har heldt på lengre. Dei skal fortelje litt om kva som skal til. Er det berre pengar og hardt arbeid eller er det også andre suksessfaktorar. Vi vil òg ha med kompetente folk som vil fungera litt som mentorar i arbeidet, men det viktigaste er kanskje at ein kan knytta nye kontakter og få hjelp til å foredla ideen litt vidare, avslutter Schmidt Fotland, som ikkje ser bort frå at dette kan vera starten på eit meir fast tilbod i form av ope hus og vaffelfredag kor gründarar i startfasen kan møtast.