Jonas Grill blir nattopen
Frå i morgon kan du ta deg ein kebab på veg heim frå fest.
Kjetil Vasby Bruarøy
Restauranten Jonas Grill, som opna i Os sentrum 29. august i år, vil utvida opningstidene for å selja mat om natta i helgene.
– Vi ser at ingen andre har prøvd seg på dette, den einaste staden du får handla nattmat no er på bensinstasjonen.
– Vi kjem til å ha restauranten open, så folk kan sitja inne og eta, og vi kjem til å selja mat frå heile menyen, seier innehavar Moustafa Khabbat.
To netter i veka
Khabbat er nøgd med dei to første månadane i drift, og seier alt frå pizza og kebab til pasta og pide (tyrkisk rett) sel godt.
– No er vi spente på korleis marknaden er om natta.
Planen er å halda ope til klokka 02.30 natt til laurdagar og søndagar framover.
– Er det mykje folk så held vi ope litt lengre. Eg har ringt kommunen for å forsikra meg at det er greit, og skal i dialog med dei igjen i morgon. Sidan vi ikkje skjenkar alkohol, trur eg ikkje vi treng noko spesielt løyve.
Første kveld med nattope bli i morgon, same kveld som den nye utestaden Baronessen, i etasjen over Jonas Grill, har opningsfest.