Kan bli landslagstrenar

Peter Mueller fekk sparken i dag. Osingen og Fana-trenaren Jarle Pedersen blir rekna som aktuell til å overta.

Kjetil Vasby Bruarøymandag 23. nov. 2009 22:05

Styret i Norges Skøyteforbund avslutta måndag handsaminga av saka mot landslagstrenar Peter Mueller.

På bakgrunn av ei hending i Berlin 31. oktober har skøyteforbundet bestemt seg for å heva avtalen med Mueller, skriv forbundet i ei pressemelding i dag.

Som landslagstrenar hadde Mueller blant anna 17-åringen Sverre Lunde Pedersen i sin stall. No kan Pedersen senior bli ein av kandidatane til å overta.

Det meiner i alle fall skøyteekspert Ove Eriksen, skriv BA.no.

- Det er ei tillitserklæring, men eg har ikkje blitt formelt kontakta av skøyteforbundet, seier Jarle Pedersen til Bergensavisen.

Pedersen, som er hovudtrenar for Fana og far til Sverre og den tidlegare aktive storebroren Eirik, vil ikkje kommentera saka vidare før styret har handsama saka.