– Kan ikkje sikra alt

Kommunen har fått ei henvending frå ei bekymra mor om at terrenget rundt Knutabruo i Osmarka ikkje er sikra med gjerde og den risikoen som då er at nokon kan forvilla seg ut på kanten og ramle i elva.

Dette var bakgrunnen for at kommunalsjef Aina Tjosås tok opp temaet i Plan- og bygningsutvalet (PBU) sist veke.

– Vi får veldig mykje spørsmål om friluftsområder vi tilrettelegg skapar farlege situasjonar. Vi har vore veldig tydelege på at vi ikkje kan sikra alt i fri natur. Det er jo nettopp den frie naturen folk ønskjer å oppleve.

– Det vi kanskje kan gjera er å markera det på eit vis, men å sikra med svære gjerder vil vi helst unngå i naturen, forklarte Tjosås.

Turgåarar har eit eige ansvar

Harald Døsen (Ap), som sit i PBU, men som også er ein av initiativtakarane bak Knutabruo og gapahuken brukameratane har bygd på austsida av oselvo gav kommunalsjefen støtte.

– Ein har jo bommen mot hesteløypa, kunne ein satt opp eit enkelt gjerde der, er det ein moglegheit?

– Ellers så kan det jo til tider vera glatt på brua. Der har noko etterlyst eit skilt. Det same gjeld ved bålpannene ved gapahuken, og vi kan kanskje sikra med å setta opp tusen skilt, men då øydelegg vi stemninga og naturen. Det er klart vi har eit ansvar, men det har dei som ferdast også, kommenterte Døsen.

– Vi ser sjølvsagt på kvar einskild sak og er løysningsorienterte, men å sikra alt går ikkje. Dette handlar mest om den forventninga som er at om noko ser litt skummelt ut, så skal kommunen komma og sikra det. Vi er trass alt ute i skogen og då må folk ferdast på naturen sine premisser, men som sagt. Vi skal ta ei befaring etter påske og sjå på det, svara kommunalsjefen.