Klubbhus blei rasert

Tre gongar på to veker har klubbhuset på Nore Neset blitt utsett for innbrot og hærverk. I natt gjorde syndarane ein grundig jobb.

Kjetil Vasby Bruarøy
08. februar 2009 - 10:11

 

- Eg veit ikkje korleis vi skal få slutt på dette, det er heilt håplaust, seier ein representant for Nore Neset fotball.

Mannen vil vera anonym. Fleire episodar med bøllete ungdom den siste tida gjer at han ikkje vil ut med namnet sitt.

- Kunstgraset, som var nytt i fjor sommar, har blitt utsett for hærverk fleire gongar. Dei svir av graset, og av nettingane på måla. Det ser ikkje ut som om dei har vore på jakt etter verdisakar i klubbhuset heller. Der er det uansett lite å henta.

No håpar han at syndarane blir tatt og at Nore Neset kan sleppa å få problem med det han karakteriserer som ein gjeng med ungdom som tydeleg har det vanskeleg.

- Vi veit ikkje sikkert kven som har gjort innbrot, men vi veit kven som fleire gongar har blitt observert i området, nokre gongar medan dei har gjort hærverk. No får vi berre håpa på at politiet klarar å stoppa dei.

 

Les meir om

Lokal Politi