Kontroll: Nokre problem blei avdekka – eitt blei til undervegs
Uhellet skjedde då føraren skulle køyra frå staden.
På dagtid i går, veslejulaftan, blei tunge køyretøy kontrollert av Statens vegvesen på Svegatjørn kontrollplass.
Det var lite trafikk dagen-før-dagen, men for nokre køyretøy fann vegvesenet forhold å reagera på. Ein førar hadde ikkje problem i utgangspunktet, men det fekk han då han skulle køyra frå staden.
Litt å reagera på
Eitt køyretøy fekk teknisk mangel for feil med rattkula.
To sjåførar fekk advarslar for brot på køyre- og kviletidsreglane.
Ein sjåfør fekk 1.200 kroner i gebyr for manglande kjetting.
Ein sjåfør fekk forbod om å reisa vidare.
Lasten hadde forskuva seg. Føraren fekk også påbod om å fjerna gjenstandar i siktsona framover.
Køyrde ned lysmast
Ein førar var uheldig etter han hadde vore inne til kontroll. Han skulle berre finna solbrillene før neste etappe, og køyrde ut til sida for å leita.
– I samband med det greide han å setta køyretøyet i røyrsle, med det resultatet at han køyrde ned ei lysmast, seier Roald Berentsen i Statens vegvesen.
